Abe-ANC benze ubuqaba: umhlaziyi

Comment on this story
NO DA8 BONGANI MBATHA Bebeshaya phansi ngonyawo bethi bazowalima baphinde bawakhe ngamageja nangamahalavu amalungu e-DA abantu bakwaSwayimane abebewavimbela. Isithombe: BONGANI MBATHA

CELANI SIKHAKHANE

UMHLAZIYI wezepolitiki ozimele KwaZulu-Natal uthi isenzo sokuziphatha ngendlela enodlame kwamalungu e-ANC abexosha abantu be-DA ngezilimazo kwaSwayimane ngoMsombuluko siyizinkomba zezinga eliphezulu lokungabekezelelani kwezombusazwe esifundazweni.

UMnuz Zakhele Ndlovu ukhulume kanje ngesikhathi ephawula ngesenzo esisha samalungu kaKhongolose nabaholi bendawo bevuka umbhejazana bevimba abaholi be-DA ngocelemba namahalavu kwaSwayimane.

UNdlovu uthe lesi senzo sihambisana nokungafundiseki kahle kwabantu ngezombusazwe futhi siyethusa ngoba i-ANC nayo phambilini ibihlale ikhononda ngokuxoshwa ezindaweni ebezaziwa ngezizinda ze-IFP esifundazweni.

“Lokhu akugcini nje ngokubuyisela isifundazwe sethu emuva ezikhathini zodlame nokulwa kubangwa amaqembu kodwa kubeka kabi nabantu abamnyama ikakhulukazi abase-KZN indlela abasaziphatha ngayo nabasabuka ngayo ipolitiki. Ngabe kungcono ukube umndeni kagogo owadlwengulwa yiwona obuvimba i-DA kodwa kudumazile ukuthi abaholi namakhosi yibona abanqume ukuzihlanganisa nalesi senzo,” kusho uNdlovu.

Uthe okuxakayo wukuthi isizathu sokuvimba i-DA asizwakali kahle ngaphandle kokuthi abantu bebethi ababafuni abelungu kwaSwayimane ngoba bangabacindezeli.

UNdlovu uthe akukapheli nesikhathi esingakanani i-ANC ikhononda ngokuvinjwa kwe-ANCYL eyayifuna ukuyokhankasa emzini kaDkt Mangosuthu Buthelezi eMahlabathini ngo-2009 kodwa konke lokhu sekwenziwa yiyo i-ANC.

“Lokhu abakwenzayo kungubuqaba ngoba yiyo i-ANC eyaziwayo ngokulwa nalabo abangafuni muntu ezizindeni zabo. Ngakho i-ANC kumele ilusukumele lolu daba ngoba i-DA iyiqembu eliphikisa ngokusemthethweni kuleli futhi elisebenza ngaphansi kwenqubo kahulumeni wentando yabantu,” kusho uNdlovu.

I-DA ibihambele kwaSwayimane iholwa wuNksz Lindiwe Mazibuko ukuyozwa izikhalo zabantu abadala ngendlela abadlwengulwa ngayo ukuze udaba lubhungwe ephalamende.

Ubephelezelwa uNkk Dianne Kohler Barnard, umkhulumeli we-DA kwezokuPhepha, uMnuz Sizwe Mchunu, ohola i-DA eKZN, uNksz Mbali Ntuli usihlalo wentsha yeqembu.

UNobhala we-ANC eMoses Mabhida Region, uMnuz Supa Zuma, uthe i-DA ayizange ixoshwe yi-ANC kodwa ivinjwe wumphakathi.

“Ngisho ikhansela ebelikhona kule nto ebiyenzeka kwaSwayimane belizizele njengelungu lomphakathi ngoba i-ANC ibingahlele lutho mayelana nokuvakasha kwe-DA kuleya ndawo ngakho akungahlanganiswa izinto ezingahlangene. Usho ukuthi namakhosi lawa abekhona ayi-ANC? i-DA ayingahlanganisi izinto ezingahlangani ngoba izifunela udumo,” kusho uZuma.


sign up
 
 

Comment Guidelines



  1. Please read our comment guidelines.
  2. Login and register, if you haven’ t already.
  3. Write your comment in the block below and click (Post As)
  4. Has a comment offended you? Hover your mouse over the comment and wait until a small triangle appears on the right-hand side. Click triangle () and select "Flag as inappropriate". Our moderators will take action if need be.

  5. Verified email addresses: All users on Independent Media news sites are now required to have a verified email address before being allowed to comment on articles. You are only required to verify your email address once to have full access to commenting on articles. For more information please read our comment guidelines