MLUNGISI GUMEDE

AKHALA ezimathonsi amalungu esitokofela i-Zizamele eDassenhoek ngephoyisa elinguCaptain alisola “ngokuwaxhopha” imali engaphezu kuka-R150 000 yesitokofela lasenga ezimi-thiyo lathi libanjwe inkunzi.

La malungu esitokofela azifikele mathupha emahhovisi eSolezwe ngoLwesibili ezobika ngalolu daba athi into ewaphathe kabi ukuthi icala alivulile esiteshini samaphoyisa eMariannhill kodwa uCaptain Christopher Gumede akaboshwa ngoba ubesebenza kusona lesi siteshi ngaphambi kokuthi ayosebenza eQeeunsburgh.

“Asineme ngendlela uphenyo oluqhubeka ngayo njengoba uGumede engaboshwa kodwa kunezinkomba zokuthi kukhona okushaya amanzi ngokuntshontshwa kwemali yethu,” kusho elinye ilungu.

Leli lungu lithe enye into ebenza basole ukuthi kukhona isandla semfene kulolu daba ukuthi leli phoyisa nabanye ababili asayina nabo uma kuyokhi-shwa imali abazange baba-tshele ukuthi bazoya kolanda imali ngoDisemba 17.

“Safonelwa sesitshelwa ukuthi nalaba ayehamba nabo babanjwe inkunzi bephuma ukuyolanda imali yesitokofela kade bengasitshelanga lutho thina njengamalungu ukuthi bazoya kolanda imali,” kusho leli lungu.

Lithe abasolwa babatshela ukuthi bamiswa owesilisa eThornwood wabacela ukuthi bamgibelise imoto ngesikhathi bethi bayamthatha kwaqhamuka i-Toyota Corolla yama phambi kwabo kwaphuma abesilisa kuyo, omunye ephethe isipanela washaya iwindi lemoto yabo, baqonda kuleli phoyisa bathi alikhiphe imali.

Leli lungu liveze ukuthi sekubhekwene ngeziqu zamehlo kulandela ukulahleka kwemali.

Kuthiwa kunelinye ilungu elizame ngisho ukuzibulala ngemuva kokuthi lizwe kuthiwa imali intshontshiwe.

Lelo lungu kuthiwa beli-hlele ukuthi lizothenga imoto ngemali ebelizoyihlukanisa.

Amanye amalungu athi wona abehlele ukuthi azofaka izingane esikoleni ngemali yesitokofela kodwa lokho akusenzekanga.

Ethintwa ngalezi zinsolo uGumede uthe igama lakhe selonakele emphakathini kodwa uNkulunkulu uyo-mphendulela ngelinye ilanga.

“Angazi ukuthi ngingahlangana kanjani nabantu ngithi abathathe imali yesitokofela esidlalwa izihlobo zami okukhona kuzo ngisho nomama ongizalayo,” usho kanje.

Okhulumela amaphoyisa aKwaZulu-Natal, uCaptain Thulani Zwane, uthe amaphoyisa aphenya icala lokubamba inkunzi okwama-nje akukaboshwa muntu.