MINENHLE MKHIZE
USIHLALO weMaritzburg United, uFarook Kadodia, ukhala ngokungabambisani kwezikhulu zebhola Kwa-Zulu-Natal (KZN) esiphenduke ikhaya lezembe ebholeni elikhokhelayo.
Iqembu likaKadodia, iTeam of Choice, lilengela engozini yokulandela ezinyathweleni zamaqembu afana naMaZulu, Lamontville Golden Arrows, Thanda Royal Zulu, African Wanderers neManning Rangers. bonke abagawulwe yizembe kula masizini edlule.
ITeam of Choice ihlezi ekugcineni ku-log ye-Absa Premiership ngamaphuzu angu-16 emidlalweni engu-23 yeligi. Leli qembu lehlukaniswe ngamaphuzu amane neJomo Cosmos ne-University of Pretoria, abahlezi endaweni ka-15 neka-14 ngokulandelana.
UKadodia uxoxe ne Solezwe ngezinto azibona zibulala ibhola e-KZN, edume ngokukhiqiza ubisi lwabadlali okubalwa kubona uSibusiso Zuma, Siyabonga Nomvete, Siyabonga Sangweni, Delron Buckley, Senzo Meyiwa ongasekho emhlabeni noBrilliant Khuzwayo, abagcina bephelela emaqenjini aseGoli.
“Inkinga yethu lapha e-KZN wukuthi asinalo ubumbano. Ukungahlangani kwethu yikona okudala izinkinga. Asibambisene sisodwa ngoba abanye bafuna kube neqembu elilodwa e-KZN esigabeni esikhulu. Ngokomthetho kumele ngabe sinamaqembu amathathu eThekwini namabili eMgungundlovu agijima esigabeni esikhulu. Buka iManning Rangers no-African Wanderers baphelele emoyeni, kanti iThanda naMaZulu badlala kuNational First Division. Isifundazwe esikhulu njengeKZN ebholeni akumele ngabe simelwe ngamaqembu amabili,” kusho uKadodia.
Ngesizini edlule izembe ligawule Usuthu, oseluyibamba kuNational First Division (NFD). Ngo-2013/2014 lidle i-Arrows. IThanda yahamba ngo-2008/2009.
“Inkinga asinabo abaxhasi ngoba osamabhizinisi bafuna ukuxhasa amaqembu aseGoli, abayingeni indaba yethu. Izinkampani eziningi zizinze eGoli kanti namaqembu amaningi azinze khona eGoli ngakho kunzima ukuthi baxhase thina,” kusho uKadodia.
Ngesizini ezayo kungenzeka i-KZN isale neqembu elilodwa esigabeni esikhulu bese igaba ngamane kuNFD.
“Ukuntula abaxhasi kugcina sekuholela ekutheni singakwazi ukuthenga abadlali abaseqophelweni eliphezulu. Kunalokho siphoqeleka ukuthi sidayise abadlali bethu abamqoka ukuze sizokwenza imali yokuphilisa iqembu. Kunzima ukuthola abaxhasi, sesingqongqoze eminyangweni eminingi kodwa lutho ukuphumelela. NePSL kufanele ifake isandla ekutheni sikwazi ukuthola abaxhasi abazosinika imali ngokulingana,” kusho uKadodia.