INLSA

KUGQUGQUZELWE abasebenza emsakazweni ukuba bangenele umncintiswano obizwa ngele-MTN Radio Awards ukuze bathuthuke kulo mkhakha. Esithombeni nguNksz Bridget Bhengu wakwa-MTN, uZandile Tembe ongumphathi wezinhlelo oKhozini, uMnuz Lance Rothschild oyi-CEO yama-MTN Radio Awards noSma Mbatha ongumdidiyeli wohlelo lukaLinda Sibiya. Isithombe: PATRICK MTOLO

BONISWA MOHALE

INKAMPANI yezokuxhumana kuleli iMTN isigqugquzele abasebenza emisakazweni ukuba bangenele umncintiswano owenzelwe bona obizwa ngele-MTN Radio Awards ukuze bathuthuke kulo mkhakha.

Ngokusho kukaNksz Bridget Bhengu wezokuXhumana kwa-MTN, lo mncintiswano wenzelwe bonke abasebenza emsakazweni kusukela kubadidiyeli bezinhlelo kuya kubasakazi.

“Okwenza ukuthi sihambele izifundazwe ezahlukene wukuthi sifuna yonke imisakazo ingenele lo mncintiswano. Siyababona bekhula abantu akade beyingxenye yawo,” kusho uNkk Bhengu.

Phakathi kwabantu asebeke bawina kulo mncintiswano kubalwa oSma Mbatha noZandile Tembe owayengumdidiyeli wohlelo lukaLinda Sibiya osengumphathi wezinhlelo manje.

UZandile uthe ukungenela lo mncintiswano kumkhulisile emsebenzini wakhe.

Uthe yize engeke athi ukhushulelwe isikhundla ngenxa yalokhu kodwa angasho angananazi ukuthi imnike isithunzi le ndondo.

“Uma ubheka iCV yami kukhona lokho okuthi ngingu-phrojusa othole izindondo. Abantu bayawazi umsebenzi wami,” kusho uZandile.

Amazwi akhe enanelwe nguSma osengumdidiyeli wohlelo lukaLinda Sibiya owawina lo mncintiswano esakwiGagasi 99.5 FM.

Yize abanye bengamenywa ukuba bangenele lo mncintiswano uSma yena wakhethwa ngongoti bezemisakazo ngoba bebona umsebenzi wakhe osezingeni.

Ama-MTN Radio Awards azoba ngo-Ephreli 14 eSandton Convention Centre, eGoli.