Dumisani Dube

ISIKHULU esiphezulu samaSouth African Music Awards uRandall Abrahams ofike nezinguquko ezinqala kulo mncintiswano, osazoqhubeka nokuvezwa bukhoma kuthelevishini

UZOQHUBEKA nokutshengiswa bukhoma kuthelevishini umcimbi owubukhazikhazi wokuhlonipha abaculi bakuleli wamaSouth African Music Awards (Sama) yize sekube nezinguquko ezinqala ngokuhlelwa kwawo.

Isikhulu esiphezulu esisha salo mcimbi uRandall Abrahams wodumo lwama-Idols, uqhamuke nezinguquko ezinqala emcimbini walo nyaka njengokuthi ngeke esaba ngoLwesihlanu nangoMgqibelo njengokujwayelekile kepha asezoba ngeSonto nangoMsombuluko (Ephreli 29-30).

Nyakenye lo mcimbi wawuseMonte Casino, eGoli kodwa kulokhu uzobuyela ekhaya lawo eSun City, eNorth West.

Yize kunalezi zinguquko, uRandall wethembisa ngokuthi lomcimbi uzoqhubeka nokuba sezingeni eliphezulu futhi usazoqhubeka nokusakazwa bukhoma kuthelevishini.

Sekuphothuliwe ukuqokwa kwabaculi abaqokelwe emikhakheni eyehlukene kanti amalungiselelo asegxile emcimbini.

URandall uthe okuningi sekumi ngomumo njengoba ngoMashi 8 bezomemezela abaculi abakhethiwe abazoqhudelana emikhakheni engu-32, endaweni esazomenyezelwa eseGoli.

UMCULI wekwaito uProfessor owawola izindondo nyakenye kumaSama. Kuzocaca ngemuva kokumenyezelwa kwabaculi abaqokelwe emikhakheni ukuthi kulo nyaka ngubani oqokelwe emikhakheni eminingi nongase awole izindondo. Isithombe: Dumisani Sibeko

INLSA

“Sigculisekile ngabantu abakhethiwe okutshengisa khona ukukhula kwendima yezokungcebeleka nokukhula kwesibalo sabaculi bakuleli abanekhono abazethembayo ngalo,” kusho uRandall.

Uthe inhloso yabo yokuyisa lo mcimbi kulezi zinsuku ezibalulwe ngenhla yingoba bafuna ukwenyusa isibalo sabantu ababukela lo mcimbi kuthelevishini behleli emakhaya.

Uthe sebengasemaphethelweni amalungiselelo okuhlelela lo mcimbi, abahleli bawo abafuna uthathiswe okweminye yemicimbi enedumela kuleli.

“Eminye imininingwane ngamaSama izodalulwa ngokuhamba kwesikhathi,” kusho uRandall.

USue Klerck oyisikhulu sakwa-Sun International uthe iSun City izizwa ihloniphekile ngokuphinde ithole elinye ithuba lokusingatha lomcimbi onedumela kangaka kwezokungcebeleka.

“Njengendawo yokuzithokozisa enkulukazi yase-Afrika, kuyintokozo ukuthi lo mcimbi uphindela eSun City. ISuperbowl iwulungele futhi lo mgubho othakaselwayo eNingizimu Afrika,” usho kanje. - INTATHELI YESOLEZWE