Amathemba abekwe kuCaster noKhotso

Lefty Shivambu

Khotso Mokoena.

LUNGILE MAJOKA

LIDONSWE ngendlebe iqembu lakuleli elilibangise kuma-Olympics eLondon izolo ukuthi libuye nezindodo ezingu-12 kule midlalo ezovulwa ngokusemthethweni ngoJulayi 27 ize iphele ngo-Agasti 12.

Imibiko iveze ukuthi indlela iSouth African Sports Confederation and Olympic Committee (Sascoc) ezimisele ngayo ngalokhu, umengameli wayo, uGideon Sam ethula inkulumo yokuvalelisa iqembu lakuleli labasubathi emcimbini obungoLwesithathu ebusuku, uthe uzosula kulesi sikhundla uma behluleka wukwenza lokho.

Uma uhambise iqembu labasubathi abangu-125 ungalindela ukuthi ngeke kube yinkinga ukubuya nezindodo ezingu-12 kodwa umlando ukhomba ukuthi eqenjini lakuleli lona ngumqansa onzima ukuwuqwala.

Elakuleli libuya ehlazweni lokuthola indondo eyodwa kuma-Olympics edlule eBeijing.

E-Athens ngo-2004 labuya nezindondo eziyisithupha, eSydney iqembu labuya nezinhlanu. Ngo-1996 e-Atlanta uJosiah Thogwane watholela elakuleli igolide emjahweni wamadoda, uHezekiel Sepeng wabuya nesiliva ku-800m, uPenny Heyns wabuya namagoli amabili ku-100m no-200m breastroke, kanti ngo-1992 eBarcelona u-Elena Meyer wathola isiliva ku-10 000m kwathi uWayne Ferreira noPien Naval nabo bathola isiliva kwithenisi.

Chad le CLos.

Gallo Images

Esikhundleni sokuthi kubonakale izimpawu zokukhuphuka kwezinga kubadlali bakuleli kule midlalo nakweminye esezingeni lo mhlaba kunalokho libonakala liya lehla. Isibonelo salokho okwenzeka eBeijing.

Kodwa kubonakala sengathi uSam nethimba lakhe babona kukhona umlingo owenzekile kule minyaka emine edlule, okuzokwenza abadlali bafike bagile izimanga eLondon.

Nokho njengoba IsiZulu sisho ukuthi akulahlwa mbeleko ngakufelwa, bakhona abadlali okuyibona abayithemba lokuthi iNingizimu Afrika ngeke ibuye ilambatha kwelika-Queen.

n CASTER SEMENYA (800m)

Ithemba ngoSemenya, oseqeqeshwa yinkakha yomsubathi ka-800m uMaria Motola, wukuthi baya kule midlalo befihle induku emqubeni.

USemenya owawina igolide kuma-World Championship ngo-2009, wabuya nesiliva nyakenye eDaugu, uzobe ebhekene nezimbangi zakhe ezinkulu kulo mkhakha eLondon okusho ukuthi kuzomele ashaye izikhathi ezinhle ukuzibekisela indawo kowamanqamu, ozomnika ithuba lokubuya nendodo.

Uzobhekana noPamela Jelimo waseKenya okuyimanje uhamba phambili ngesikhathi esingcono kulo nyaka (1:56: 76) kanti kukhona noMariya Savinova waseRussia owashiya uSemenya eDaugu nyakenye. Izikhathi zalaba basubathi zikhomba ukuthi uSemenya kuzofanele agijime isikhathi esingaphansi kwemizuzu emibili, asathole kunzima ukusiqopha kulo nyaka.

n KHOTSO MOKOENA (long jump)

Akungatshazwa ukuthi uMokoena uthwele amathemba njengoba wakwazi ukuvala ihlazo ngo-2008. Lolu ngqwazi lwaseHeidelburg lukleliswe endaweni yesithupha ngo-8.29m emhlabeni kanti luzobe lubanga nabadlali abanjengoGreg Rutherford waseBritain, Sergey Morgonov waseRussia noSebastian Bayer waseGermany abangabanye ababekwe phezulu kunaye.

UMokoena wagxuma ibanga elingu-8.24m eBeijing kanti abangaphambili kunaye bami ku-8.35m okusho ukuthi naye kuzomele awakhuphule amasokosi ukuzibeka ethubeni lendondo.

n CHAD le Clos (swimming)

Lo mfana (19) unethalente eliyisimanga njengoba kuyimanje ephethe irekhodi lomhlaba ku-200m butterfly. Eminye imikhakha azoyibhukuda yi-200m, 400m individual medley, ne-200m freestyle. Cishe kuyona yonke le mikhakha uzobe ebhekene nenhlambi yase-United State of America, uMichael Phelps owagila izimanga eBeijing ewola amagolide ayisishiyagalombili.

NgokukaLe Clos odabuka eThekwini inhloso yakhe ngemidlalo yaseLondon wukuyothola isipiliyoni, yena ubheke imidlalo yango-2016 eBrazil.

Nokho ngokweSascoc isipiliyoni sakhe kuzomele sihambe nendondo noma izindondo ukuze abe yiqhawe emehlweni ezikhulu zayo.

n Sunette Viljoen (javelin)

Le ntokazi yaseGoli inekhabethe eligcwele amagolide (ayisishiyagalombili). Yize ingekho indodo aseke wayithola kuma-Olympics phambilini (eSydney nase-Athens) kodwa kulokhu ubonakala enethuba lokubalwa nabathathu abenze kahle.

Ngenyanga edlule uqophe irekhodi elisha lase-Afrika ephonsa u-69.35m eNew York, okuyibanga elingcono eselike laqoshwa kulo nyaka.

ELondon uzobhekana noBarbora Sportakova waseCzech Republic ongumpetha waseBeijing futhi ophethe irekhodi lomhlaba elingu-72.28m.

n LJ van Zyl (400m hurdles)

“Angidingi ukuba nerekhodi elihle lesizini ukuze ngenze kahle.” Mhlawumbe la mazwi alo mgijimi anganika ithemba kubona bonke abakuleli.

Nyakenye uVan Zyl uye eDaeugu enesikhathi esehle emhlabeni kodwa wabuya nethusi. Lokhu uthi kumfundisile ukuthi emjahweni kumele wenze ngendlela yakho ungabheki izimbangi ukuthi zenzanjani. Uyakholwa wukuthi unalo ithuba lobuya nendondo eLondon.