Basale bengawuvali umlomo ngelaseKZN

.

YILO leli iqembu laseKZN le-Under 21 elishiye abantu bengawuvali umlomo eMpumalanga ngendlela abadlale kahle ngayo, yize begcine bangayiwinanga i-Under 21 SAB National Championships. Abangemuva: Smanga Mabena (ukaputeni), Nduduzo Sibiya, Xolile Magaye, Mikhael James, Nhlakanipho Ngiba, Bongani Xulu Ngaphambili: Sonke Ntuli, Mpumelelo Sithole, Siphesihle Ndlovu, Lindokuhle Memela, Nkosingiphile Sondezi. Isithombe: BACKPAGEPIX

MALIBONGWE MDLETSHE

noMBONGISENI BUTHELEZI

UTUSE ukuzimisela kwabadlali bakhe umqeqeshi wesikwati sika-Under 21 saKwaZulu-Natal, uSmart Ndlovu, oqokwe njengomqeqeshi ovelele ngenxa yokuzinikela kwabadlali bakhe kuSAB Under 21 National Championship esongwe ngeSonto KaNyamazane Stadium, eMpumalanga.

Abafana baseKZN balale endaweni yesine ngemuva kweMpumalanga esendaweni yesithathu, Ussa neGauteng engompetha balo nyaka.

Nokho iqembu laseKZN ebelihlome ngabadlali abasebancane lizakhele ugazi kubalandeli, abahlolikhono beSafa nabazingeli bamaqembu ePremier Soccer League (PSL) ngokudlala ibhola elidle ngomjiko oya phambili kulo mqhudelwano obekuqhuthana khona izifundazwe eziyisishiyagalombili nesikwati sezikhungo zemfundo ephakeme i-University Sports of South Africa (Ussa).

UNdlovu, obekungokwesibili ecija leli qembu ngokubambisana nensephe yomqeqeshi wezinkulisa uMax Ndlovu, uthe uyaziqhenya ngabadlali bakhe abamise umhlwenga zibekwa kwaze kwaba sekugcineni kulo mqhudelwano.

“Badlale ibhola elihle kakhulu nelikhulile kunabo, basibusise kakhulu singabaqeqeshi babo. Angingabazi ukuthi nesifundazwe siyaqhenya ngabo njengoba leli phepha belilokhu lizibika izimanga abazenzayo. Ukuzimisela kwabo kuzobacabela indlela ebheke emadlelweni aluhlaza,” kusho uNdlovu.

Lo mqeqeshi ocija i-Island, egijima kuSafa KZN Vodacom Promotional League, uke waphumula wukulamula abadlali nonondweba kwazise ubezithola esephakathi kwezidubedube njengoba leli embu laKwaNongoma belizifikela qathatha kunondweba osuke ethathe izinqumo ezingaligculisanga emidlalweni yeVodacom.

“Ngosuku lokuqala besibhekene nesimo esinzima sishodelwa abadlali, omunye uthole ikhadi elibomvu sasala nabadlali abangu-15 kuphela. Ngokubona ukuthi yithina esinabadlalai abasebancane kunabo bonke, umgomo esizibekele wona ngowokufika ku-semi final. Bafike kalula lapho abafana nokwenze ngawabona evulekile amasango efayineli,” kubeka uSmart.

Ngokudla umhlanganiso iGauteng ikhale yemuka nesheke lika-R20 000, umdlali ovelele wathatha u-R10 000 kanti kuyo yonke imidlalo umdlali ovelele ubethatha u-R1 000.

Imiklomelo ihambe kanje:

Umshayimagoli ovelele: Philimon Lehodi waseGauteng namagoli angu-6;

Unozinti ovelele: Reuben Mokoena waseGauteng;

Umdlali ovelele: Peter Maphetho waseGauteng;

Umqeqeshi ovelele: Smart Ndlovu waseKZN;

Unondweba ovelele: Khulekani Thusi waseKZN;

Umsizi kanondweba ovelele: Sindi Ndaba waseMpumalanga