MLUNGISI GUMEDE

Ebika eseMbitane KwaMaphumulo

UMNDENI usola indodana esehlakalweni sokushiswa komuzi wakubo okushone kuso unina wayo omdala nabashana bayo ababili esigodini eMbitane, KwaMaphumulo.

UNksz Masisi Gabi Mhlongo (50) nabazukulu bakhe ababili u-Fanelesibonge Ntuli (6) no-Amahle Nxumalo (5) bashe bangqongqa ngesikhathi kusha indlu abebekuyo ngoMsombuluko emini. Amanye amalungu omndeni anuka indodana kadadewabo omncane kamufi engeke ize idalulwe ngalesi sehlakalo.

Lona wesilisa oneminyaka engu-28 ofunda eNyuvesi yasoNgoye kuthiwa nguyena kuphela obekhona ekhaya ngesikhathi kwenzeka lesi sigameko.

Kuthiwa utshele omakhelwane abebezocisha umlilo ukuthi yena ubelele akazange ezwe ngesikhathi kusha indlu yakubo.

Inkulumo yakhe ibe nokushayisana ngoba kuthiwa uphinde wathi nguyena ozame ukuvula isicabha ngesikhathi kusha indlu wabe esehanguleka.

Kodwa omakhelwane bathi bona bafike isicabha sendlu ebisha sivalilwe yibona abasivulile ngesikhathi bezama ukucima umlilo.

Kuthiwa le nsizwa iphinde yathi umlilo udalwe wukuqhuma kwe-gas endlini kodwa leyo-gas ekhuluma ngayo itholwe ingenalutho kubonakala ukuthi ayingazange ishe.

Udadewabo kamufi kodwa ongathandanga ukuthi adalulwe ngoba esaba ukuthi kuzoxoveka umndeni uthe ayikho indaba yokuthi laba abashonile baqhunyelwe yi-gas.

Uthe lo mlilo ushiswe umuntu thizeni abangakatholi ukuthi ubani.

Leli lungu lomndeni liphinde laveza ukuthi lona abamsolayo kulokhu ubengahoshelani nomufi uNksz Mhlongo.

“Uke wasabisa ngokuthi uzombulala udadewethu ngo-Novemba ngonyaka odlule waze wamxosha ekhaya wayohlala komakhelwane. Samtshela ukuthi ngeke akwazi ukumxosha udadewethu emzini kababa kodwa nguyena okumele ahambe ngoba akusikhona kubo lapha,” lisho kanje.

Umakhelwane uNksz Buyenzeni Ngcobo uthe bafike vele laba abathathu sebeshonile.

“Thina sifike indlu isasha kodwa abebephakathi sebeshonile sazama ukucima umlilo sahluleka ngoba amanzi awekho endaweni, besiwakha emfuleni,” usho kanje.

UNksz Ngcobo uthe indlu ize yacishwa yizicimamlimo ebezisuka eStanger.

Ikhansela lendawo uMnuz Phendukani Ngcamu naye uhambe emagameni abanye wathi ayikho indaba yokuqhuma kwe-gas.

“I-gas eqhumile iyabonakala kodwa lena kubukeka sengathi umlilo awuzange uyithinte,” usho kanje.

UNgcamu uthe ngesikhathi ephuthumisa umsolwa esibhedlela izolo ngemuva kwesehlakalo umtshele ukuthi yena ubezilalele akazange ezwe lutho ngesikhathi kusha indlu.

“Okunye angitshele kona wukuthi ubone umufi ecanda ukhuni wazigenca unyawo wabe eseyongena endlini eyofudumezela izingane ukudla esitofini se-gas kanti sizomqhumela bashe endlini,” kusho uNgcamu.

Umfowabo kamufi uMnuz Mphindeni Mhlongo uthe sekungokwesithathu kusha indlu kubo.

Uthe esigamekweni sesibili kwashona ingane yakwamakhelwane ngesikhathi kusha indlu kungekho muntu abadala beye emlindelweni komunye umuzi.

Okhulumela amaphoyisa aKwaZulu-Natal uCaptain Thulani Zwane uthe amaphoyisa afice inqwaba yegazi endlini.

Uthe ngeke akwazi ukuqinisekisa ukuthi kwenzekeni. UZwane uthe baphenya icala lokushisa.