UMA ubucabanga ukuthi umjaho onesasasa emhlabeni onqamula amazwe anogwadule iDakar Rally ngowezimoto ezincane namaveni kuphela ushaye phansi ngoba bekuboshelwe namaloli.

Enye yamaloli ezibonakali-sile kulo mjaho iHino yamaJapan (bheka isithombe esincane) enqobe lo mjaho okwesithathu selokhu kwavulelwa namaloli.

Amaloli angenela lo mjaho kumele kube ngawenjini engu 10 litres nangaphansi. Umjaho walo nyaka uqale ngoJanuwari 1 eMar-del-Plata e-Argentina, wanqamula kwesabavukuzi eChile waze wayophelela ePeru eLima ngesonto esiphuma kulo ngoJanuwari 15. Amaloli ahambe ibanga elingu 8 336km, kanti bekunezigaba ezingu 14 lapho abefike adlule khona kube khona onqobayo kulesi sigaba ngaphambi kokusongwa kwamakhilomitha wonke.

Iloli eligile izimanga kube iHino 500-Series elishayelwa uTeruhito Sugawara no Seiichi Suzuki. Enye iHino engene endaweni yesibili ibihamba umakadebona kulo mjaho uTeruhito oneminyaka engu 70.

IHino, okuyiloli lokuqala lamaJapan ukungenela lo mjaho, laqala iDakar ngo 1991. Kwenye iDakar Rally yagcina ihoxisiwe ngenxa yezimpi e-Afrika. Omunye umjaho abawungenela waphelela eCape Town uqale eParis.

Khonamanjalo, ithimba lakwa Toyota iTeam Imperial Toyota lijabule ngokuqeda lo mjaho ngesikhathi esikahle.

IDakar Rally isithathwa njengomjaho wokuxhumanisa amazwe nokuqinisa ubuhlobo. Kuwo wonke amazwe lapho kunqamula khona izimoto izivakashi zishiya okuthile kuhlomule abantu bendawo ngokomnotho.