AKAFUNI ukuzikhathaza ngokudlalela iBafana Bafana nokuyogijima phesheya kwezilwandle umdlali weMamelodi Sundowns, uPercy Tau, odlala ibhola elinenkosi phakathi.
UTau (22) usefomini enhle kulezi zinsuku. Ngesizini edlule ubolekiswe kuWitbank Spurs egijima kuNational First Division (NFD). Selokhu ebuyile kuSundowns uTau uvutha engabaselwe .
UTau, oyinxele, ube nomthelela ekuthatheni kweSundowns isicoco seCaf Champions League, yaphinde yafinyelela kowamanqamu weMTN 8 eshaywe kuwona yiBidvest Wits.
Abaningi sebeqalile ukulibeka ngembaba elokuthi uTau akumele afakwe esikwatini seBafana esizodlala imidlalo yokuhlungela ukuya kuCaf Africa Cup of Nations ka-2019. Abanye abathandi bebhola babona esekulungele ukuyoyibamba phesheya kwezilwandle.
UTau uthe akazimisele ngokuyifaka emqondweni indaba yokuyodlala kuBafana naphesheya kwezilwandle.
“Kuyiphupho labo bonke abadlali ukudlalela izwe labo nokuyibamba phesheya kwezilwandle eNingizimu Afrika. Zombili lezi zinto kumele uhlale uzilindele. Nokho akuzona izinto engicabanga ngazo njengamanje. Okubalulekile wukuthi ngiqhubeke nokwenza kahle kuSundowns. Uma ngibizwa kuBafana kumele ngikulungele ukudlala kuyona ngaleso sikhathi futhi uma lifika ithuba lokuyodlala phesheya kwezilwandle komele ngilithathe. Kodwa-ke akukho emqondweni wami ngoba akukenzeki,” kusho uTau.
Nguyena oshaye igoli njengoba iSundowns ibikade idlala kuFifa Club World Cup.
“Okungenza ngibe kuleli zinga yingoba ozakwethu bayangeseka kanti nethimba labaqeqeshi linginika inkululeko yokuthi ngidlale ngendlela engikwazi ukudlala ngayo ibhola. Lapha ngikhuluma ngokujika izitha bese ngiphasela engisuke ngidlala nabo noma ngikhahlelele ipali. Ukubolekiswa kuWitbank Spurs kungisizile. Ngikukhulisile ukuzethemba kwami ngaphinde ngaba sesimeni esikahle. Ngesikhathi ngibuya kuSundowns bengazi ukuthi ithuba lami kumele ngilibambe ngezandla zombili ngoba bengazi ukuthi umbango wejezi ushubile. Yingakho ngingazange ngisabheka emuva ngemuva kokuthola ithuba lokudlala,” kusho uTau.
Namuhla ngo-6 ntambama iSundowns izodudulana neBaroka FC ePeter Mokaba Stadium, ePolokwane, eLimpopo.
“Impumelelo yami ngeke ngiyifake ekhanda. Sengikhulile manje ukuthi ngingajatshuliswa wukuthi abalandeli bayayithakasela indlela engidlala ngayo. Ukuthakaselwa ngabalandeli akumele kungenze ngizithwale kodwa kumele kungigqugquzele ukuze ngingabaphoxi. Mina ngihlale ngiphokophelele ukuya phezulu ngaso sonke isikhathi,” kuphetha uTau.