LICEKELEKE phansi ekugcineni itulo labantu baseGabon abebekade belibophile lokuthi imidlalo yomqhudelwano iTotal Africa Cup of Nations (Afcon) “izobukwa yizinyoni” ukuze kuzwakale ukunganeliseki kwabo ngomengameli * -Ali Bongo Ondimba.
NgeSonto ebusuku imidlalo ye-Afcon isongwe ngaphandle kwezihibe. ICameroon ihlule i-Egypt ngo 2-1 e-Amitie Stadium, eLibreville, eGabon.
Bekungokokuqala le nkundla elayisha abantu abangu-38 000 imumatha umthamo omkhulu kusukela kuqale i-Afcon.
Ngisho iqembu lasekhaya, iGabon, lihlulekile ukudoba inqwaba yabalandeli. Kuvele ukuthi abantu baseGabon kabajabule ngempatho kaBongo okuthiwa ungundlovukayiphikiswa.
Ngasekuqaleni komqhudelwano kukhona ababoshiwe ngamacala okugovuza umphakathi ukuthi ungalubhadi ezinkundleni nokuqala isiteleka.
Umphakathi ukhala ngokuchithwa kwemali ku-Afcon esikhundleni sokuthuthukisa izwe nokwakha amathuba emisebenzi. Ukungenami kwabo bakuveze kusukela kuqala i-Afcon.
Nokho ukutheleka ngobuningi kwabantu baseCameroon bezobuka iqembu labo ligijimisana ne-Egypt kowamanqamu kwenze sangafezeka isifiso sabalandeli baseGabon.
Ngaphambi kokuthi kuqale umdlalo abalandeli be-Indomitable Lions bebeviliyela emigwaqweni, behlobe ngemifaniswano yaleli qembu.
Enkundleni baqale ukuhuba ingoma abadlali besazozifudumeza. Kuchwaze inkundla ngesikhathi umengameli weCaf * -Issa Hayatou egaxa * -Ondimba umgexo wegolide.
Inkundla yonke igcine isimemeza ithi “Ali, Ali, Ali.” Kuhlale obala ukuthi * -Ondimba ufana nabanye abaholi okukhulunywa kabi ngabo uma bengekho kodwa uma sebekhona bathakaselwe. Cishe kulo lonke elaseGabon kukhalwa ngokuthi umengameli udla imali uyenqaba ukuthuthukisa izwe.
Emuva komdlalo abalandeli beCameroon baqhubekile nokuviliyela emigwaqweni yaseGabon, bezicima ngeziphuzo ubusuku bonke.
Omunye wabalandeli uthe: “Siyajabula ukuthi siwinile. Singamazwe amaphakathi ne-Afrika sonke kule ndawo kodwa amanye ayayizonda iCameroon, angazi ukuthi kwenziwa yini. Ngiyafisa kodwa ukuthi le ndebe siqhubeke nokuyigcina ikakhulukazi njengoba sizosingatha i-Afcon ngo-2019,” kusho umlandeli.
Kubantu baseGabon, ukuphela kwe-Afcon, kusho ukubuyela osizini lwemihla ngemihla.