BAZIDELILE bavuma ukwehlisa imiholo abadlali beHighlands Park edliwe yizembe ku-Absa Premiership ekupheleni kwesizini ka-2016/2017.
IHighlands Park ihlale isizini eyodwa esigabeni esikhulu emuva kokuwina ama-Play Off ekupheleni kweka-2015/2016. Iqede emsileni wePremiership nokuyishovele kwiNational First Division (NFD). Umdlalo wokugcina weHighlands wesizini edlule ufane nosuku olumnyama kwazise iwudlale inethemba lokuthi izosinda ezembeni kodwa yahluleka ukuthola amaphuzu amathathu ibanjwa yiMamelodi Sundowns ngo 2-2.
Ukushaya ngabadlali abasezingeni eliphezulu nabangomakadebona kuPremiership yikhona obekubaqinisa idolo abalandeli ukuthi bazosinda ezembeni. Kulaba badlali kukhona uCollins Mbesuma wodumo kuKaizer Chiefs, Franklin Cale owawina izindebe ne-Ajax Cape Town, Thanduyise Khuboni owayengukaputeni weLamontville Golden Arrows, Tapuwa Kapini owayengunozinti weqembu lesizwe laseZimbabwe, Lindokuhle Mbatha obephuma kuMamelodi Sundowns.
Isolezwe lithole ukuthi abadlali beHighlands Park bathathe isinqumo sokwehlela kwiNFD neqembu njengendlela yokukhombisa ukuthembeka ezikhulwini nokusebenzela ukulibuyisela kuPremiership. Emasontweni adlule kuvele ukuthi kunamaqembu afuna uMbesuma.
“Sikhulumile nabaphathi futhi siyakuqonda ukuthi ngeke isafana imali njengoba sesizodlala kwiNFD kodwa sifuna ukubuyisela iqembu kuPremiership ngenxa yendlela abasiphathe ngayo. Mina abekhona amanye amaqembu abengifuna kodwa ngacabanga ukuthi iHighlands yangithatha ngingenalo iqembu emuva kokushiya kuMaZulu,” kusho uKapini.
“Ngizwa sengathi sibenzele phansi abaphathi abebekade besethembile. UMbesuma naye ukhona, ufuna ukudlalela iqembu.”
IHighlands Park izoqeqeshwa nguThierry Mulonzo obekade eyiphini lomqeqeshi kusukela isadlala kwiNFD.
Uthe abazimisele ngokuhlala isikhathi eside kulesi sigaba.
“Sifuna ukuhlala isizini eyodwa kwiNFD sibuye. Asifuni ukuhlala kakhulu. Sinabadlali abanye abangakaze badlale kulesi sigaba nokusafanele bajwayele indlela okwenziwa ngayo izinto. Kuzoba nzima kubona ukujwayela. Kodwa kuzosiza ukusebenza ngokubambisana,” kusho uKapini.