BAZOTHOLA ingqayizivele yethuba lokuthatha ama-selfie nabadlali babo ababakhonzile abalandeli beKaizer Chiefs abaseMlaza namaphethelo namuhla kusukela ngo-12 emini kuze kube * -5 ntambama, enxanxatheleni yezitolo ekuleli lokishi eyaziwa ngeleMega City.
Lokhu kungenye yezinhlelo zeChiefs zokuxhumana nabalandeli ngokusizana nabaxhasi babo iVodacom njengoba bezoqala eMzumbe lapho bezohambela khona eSibanani Community Hall, lapho behambisa khona izinsiza kwezokuxhumana kubantwana abangu-100 abafunda ngaphansi kwalo Masipala oholwa yiMeya uSizwe Ngcobo.
Ngokusho kweChiefs abalandeli bazothola ithuba lokufakana imilomo, bathathe nezithombe nabadlali abafana no-Eric Mathoho, Ryan Moon, Keagan Buchanan noCamaldine Abraw. Ziningi izinhlelo zokuthokozisa abalandeli lapha, kunezindawo zokudlala i-playstation, imishini yokudlala ibhola (table soccer) nokunye okuningi okuzobashiya bebheme bakholwa.
Imiklomelo izobe iyindathane kwazise abaxhasi beChiefs kusukela ngo-1999, uVodacom uzobe unemincintiswano eyahlukene ngenhloso yokukhulisa isasasa ngomdlalo waleli qembu okusasa ngo-6 ntambama, eMoses Mbahida Stadium, eThekwini.
Umcimbi wezemfundo waseMzumbe uzoqala uzoqala ngo-9.30 ekuseni khona namuhla uze uphothulwe ngo-11.30. Laba bafundi ababalelwa ku-100 baseMzumbe bazothola ithuba lokucijwa kabanzi ngakho konke okuthinta ubuchwepheshe besimanje. Inhloso yabakwaVodacom neChiefs ukuqwashisa izingane ngezinto ezifana nokugwema ukucwaswa kwezokuxhumana nendlela nje yokuziphatha ezinhlakeni eziningi zezokuxhumana.
Kulona lolu hambo lweChiefs, isikhwama sakwaVodacom sizoxhasa ngezinqola ezintathu ezizobe zigcwele imishini ezokuba wusizo kulezi zingane ngisho laba bazivakashele sebehambile. Phakahti kwezipho ezikhona lapha kubalwe ama-laptop, i-rouater (umshini wokudonsa i-WiFi), i-projector (i-TV edlala nasodongeni) nokunye okuningi okuthinta ezemfundo.