SEKUVELE omunye umdlali wakudala we-Orlando Pirates okhwele wadilika kubadlali bamanje baleli qembu ngokungazihloniphi bona uqobo, ukungabi nendaba nabo bonke abalandeli baleli qembu nokungawushayi mkhuba umlando weqembu elihlanganisa iminyaka engu-80 lasungulwa.
URuben Cloete udle izicoco eziyisikhombisa ngaphansi kukaRuud Krol njengoba efike kuleli qembu ngo-2010 waze walishiya ngo-2012. Ngalesi sikhathi uCloete usize iBucs idla izicoco ezimbili zeligi, ezimbili zeMTN 8, iNedbank Cup, Telkom Knockout neseCarling Black Label Cup.
NgokukaCloete osuke kuBucs waya kuMaritzburg United ngo-2012, okwenzeke ngemuva kokuthi iqembu lakhe elidala linenebulwe ngo 4-1 yiSuperSport United ngoMgqibelo eThekwini kumshiye eshaqekile kodwa wase ekhumbula ukuthi kungani omunye wabadlali abadle inqwaba yezicoco nePirates, uMoeneeb Josephs, ekhwele wadilika ebabiza ngabadlali baka-Instagram.
“Kuyaphoxa engikubone ngemuva komdlalo. Abadlali bePirates beqhulula amahlaya behleka kuze kuvele elomhlathi nabantu abaqeda ukubanenebula ngo 4-1 kowamanqamu. Iqembu linqobe imidlalo eyisithupha ladlala ngokulingana kwengu-15 isizini yonke. Ngalo nyaka iqembu lihlanganisa iminyaka engu-80 lasungulwa. Abalandeli baphume ngobuningi babo ngoba bathenjiswe ukuthi bazosulwa izinyembezi kwazise bake bathola isibhaxu sika 6-1 uvela eqenjini elifanayo. Ngaphezulu kwalokhu iPirates ike yathola ngisho u 6-0 ngayo belu le sizini. Kufika kanjani ekutheni ungalihloniphi ngale ndlela ijezi ukuthi uze uqome ukuncokola nabantu beqeda ukukuxebula. Kubuhlungu okwenzeke kubalandeli beBucs ngoMgqibelo. Bese uyazibuza ukuthi kungani bemhlaba uMoeneeb (Josephs) uma ethi bangabadlali bezinkundla zokuxhumana,” kusho lo mdlali ogcine ukubonakala kuChippa United ngaphambi kokungena emabhizinisini.
Kwenzeka lokhu nje akuphele sikhathi esingakanani uJosephs ehlaphaze kwasani oludlalela iPirates naye ebasola ngento efanayo.
Ngaphandle kukaCloete noJosephs, ziningi ezinye izinkakha zaleli qembu ezikhala ngohlobo lwabadlali abakhona kuBucs njengamanje. Kulezi zingwazi ezindala zeBucs singabala o-Andile Cele, Andries Sebola abasole abadlali ngokungazigqaji ngejezi abaligqokayo.
Isizini ka-2016/2017 bekungeyesithathu ephelile iPirates yagcina ukuwina indebe.