LIZOQEQESHWA nguRoger Sikhakhane iqembu elisha laseRichards Bay elizogijima kwiNational First Division (NFD).
Lezi zindaba zitshelwe Isolezwe wumthombo walo othembekile. Namuhla kulindeleke ukuthi iPremier Soccer League iphaphisise ukudayiselana kwaMaZulu FC neThanda Royal Zulu engompetha bangesizini edlule beNFD.
Ibamba lesikhulu esiphezulu kwiPSL, uMato Madlala, kuleli sonto liqinisekisile ukuthi luzodingidwa lolu daba emhlanganweni wanamuhla.
Ngokunqoba iThanda ibizodlala ku-Absa Premiership ngesizini ezayo kanti AmaZulu wona ahlulekile ukukhuphukela esigabeni esiphezulu njengoba esethenga.
Kuvela ukuthi isitifiketi saMaZulu sokudlala kuNFD sizothathwa nguSifiso “Jomo” Biyela osezoba neqembu lakhe.
“UBiyela useqalile ukuthungatha abadlali azoqinisa ngabo iqembu lakhe. Uzobuyisa ithimba elifanayo labaqeqeshi. Lizoholwa nguyena uRoger Sikhakhane ozosebenza noJomo Ntuli noSipho Zimba. Okwamanje indaba yegama leqembu isabhungwa,” kusho umthombo.
USikhakhane uzothola u-R300 000 nenye imali ngaphezu ngokufaka iThanda esigabeni esikhulu. Lezi zindaba zitshelwa leli phephandaba ngusihlalo weThanda oseyidayisa uPierre Delvaux.
Iqembu likaBiyela lizodlalela imidlalo yalo yasekhaya eMhlathuze Sports Complex, eRichards Bay okuyinkundla ebisetshenziswa yiThanda.
“Iqembu likaJomo ngeke lishintshe kakhulu uma uliqhathanisa neqembu leThanda elidle umhlanganiso. Uzimisele ngokuthi baphinde lokhu abakwenze ngesizini edlule. Leli qembu ufuna kube ngelabantu baseRichards Bay namaphethelo,” kusho umthombo.
UBiyela ethintwa ngendaba yeqembu ucele ungaphawuli kakhulu.
“Konke kusezandleni zePSL. Ake silinde sizwe ukuthi izothini. Mayelana nokuthi sengizoba neqembu yinto ebengingayazi leyo. Mina ngisasebenza njengomsebenzi weThanda. Nathi silinde isinqumo sePSL,” kusho uBiyela.
IThanda ibisizabalaze iminyaka eyisikhombisa izama ukubuyela esigabeni esikhulu. UDelvaux uyidayise ngoba ekhala ngokuxinwa yizikweletu. Ukusho kwagcwala umlomo exoxa naleli phephandaba ukuthi usefuna ukushiya unomphelo ebholeni ngoba alisamletheli injabulo kodwa kunalokho limdalela usizi.
Usuthu nalo lisanda kuqinisekisa ukuthi ngeke lenze inqwaba yezinguquko uma selidlala esigabeni esikhulu.