UMQEQESHI we-Ajax Cape Town, uStanely Menzo, uthe iqembu lakhe lizifake ehlazweni lishaywa yiqembu eligijima ku-ABC Motsepe League iKwaDukuza United emdlalweni weNedbank Cup Last 32 eSugar Ray Xulu Stadium, eClermont, eThekwini, ngoMgqibelo.
IKwaDukuza ishaye i-Ajax Cape Town ngo 4-3 sekukhahlelwa amaphenathi emuva kokuba umdlalo uphele ngo 2-2.
Amagoli eKwaDukuza ashaywe wuLungelo Zondi noKhulekani Ndlela, kwathi awe-Ajax eza noNeo Makua noPrince Nxumalo.
Leli qembu iKwaDukuza eliqeqeshwa nguThami Ngubane belisho ukuyiqeda i-Ajax esiwombeni sokuqala njengoba beyihluleka ukumelana nebhola elidla utshani ebelidlalwa yiKwaDukuza.
Kwale ngisho umqeqeshi we-Ajax esefaka uNathan Paulse ngesiwombe sesibili kodwa abafana abancane bebemqaphile njengoba naye ehlulekile ukusebenzisa ubude bakhe ukudla amabhola aphezulu.
UMenzo obethukuthele eqhuma emuva komdlalo uthe abadlali be-Ajax bafake iqembu ehlazweni ngendlela abadlale ngayo.
“Angazi ukuthi ngingakhuluma ngithini ngomdlalo wanamhlanje, sihlulwe wukuqedela amabhola sesisebhokisini. Empeleni silihlambalazile iqembu, into okumele siyenze wukuxolisa eqenjini. Ngeke ngigxeke umdlali oyedwa kodwa ngizozigxeka mina, ithimba labaqeqeshi nawo wonke umuntu ozibandakanye nalo mdlalo ngokuhlambalaza abalandeli be-Ajax neqembu uqobo. Siyaxolisa ngalokhu okwenzekile,” kusho uMenzo.
I-Ajax ibishiye ngaphandle abadlali abenza kahle eqenjini abafana noMark Mayambela noThabo Mosadi.
UMenzo ukholwa ngukuthi leli kube ngelinye iphutha alenzile yize ebengayibukeli phansi iKwaDukuza.
“Uma uzodlala nanoma yiliphi iqembu kuba nezinqumo ozithathayo. Nami kube yisinqumo engisithathile ukuthi ngibashiye ngaphandle kodwa ngikholwa ngukuthi kube yiphutha elikhulu. Ngendlela ebengihlele ngayo bengikholwa ukuthi iqembu ebengilibophele belizoyishaya iKwaDukuza,” kusho uMenzo.
Lo mqeqeshi uthe okumkhathazayo ngokushaywa yiKwaDukuza ukuthi akazi ukuthi kuzoba nomthelela onjani eqenjini lakhe elivele lingenzi kahle.
I-Ajax ayikaze inqobe umdlalo kusukela kuqale umzuliswano wesibili we-Absa Premiership.
“Njengoba sesiphumile kuNedbank kusho okuthi sesizogxila ku-Absa Premiership. Kodwa into engikhathazayo ngukuthi ukushaywa yiqembu elincane kuzoba nomthelela onjani ekuzethembeni kwabadlali. Nginethemba lokuthi abadlali ngeke bazwele kakhulu kulokhu kushaywa bazovuka bazithathe njengoba sidinga ukunqoba imidlalo ye-Absa Premiership ukuze sihlale siphephile.”
I-Ajax ihlezi endaweni ka-12 ku-log ye-Absa Premiership ngamaphuzu angu- 21 emdlalweni engu-20.