UMQEQESHI weBidvest Wits, uGavin Hunt, usekhathele ukumataniswa nomsebenzi wokupheka iBafana Bafana osekuphele izinyanga ezintathu ingenaye umlolongi kusukela kukhonjwe indlela u-Ephraim “Shakes” Mashaba, ebimsola ngokuhudulela phansi isithunzi seSafa.
Kusukela exoshiwe uMashaba iSafa ayikaze iphumele obala ngabaqeqeshi ebahlolela lo msebenzi ngaphandle kokukhipha ikomiti elinoLucas Radebe, Neil Tovey, Benni McCarthy nabanye, okuthiwe yilona elizoqoka umqeqeshi ozoqhuba umkhumbi weBafana.
Ngaphandle kwaleli thimba namagama amataniswa nalo msebenzi alokhu evele njalo. Okunye okuqedela abalandeli beBafana uthando, ukuthi iSafa ilokhu ikuhlehlise njalo ukumenyezelwa komqeqeshi omusha kodwa ukuqala kwemidlalo yokuhlungela i-Afcon ezayo kulokhu kusondele njalo.
Baningi-ke nokho nabaqeqeshi iSafa ebilokhu ibaqinisekisa ukuthi bakhona ohlwini lwababhekelwa lo msebenzi kodwa nangabo labo baqeqeshi sekuphinde kwathula. Phakathi kwalaba baqeqeshi kukhona uCarlos Queiroz, Herve Renard, Hugo Broos, Ruud Krol, Stuart Baxter noHunt.
Nakuba lolu luhla lukhishiwe kodwa sekuyaziwa ukuthi uQueiroz oku-Iran, uRenard weMorocco noBroos weCameroon, ngeke bakwazi ukuthatha lo msbenzi ngenxa yokuxineka. Ilokhu ivela nekaBaxter kodwa lo mqeqeshi umile ekutheni akawufuni lo msbenzi futhi akekho oseke wamqonda ngawo.
Yikhona kanye lokhu okucasula uHunt ngalokhu kumataniswa nalo msebenzi ekubeni engakaze awucele futhi kungekho noyedwa weSafa oseke wamthinta ngawo.
“Indaba yeBafana yinto engingayicabangi ngisho ngilele okwamanje. Okwenza ngikhulume kanje ukuthi ayikaze ikhulume lutho nami iSafa ngalo msebenzi. Khona akungiphazamisi emsebenzini wami kodwa isiqala ukucika le nto yokumataniswa nalo msebenzi. Iqiniso ukuthi le ndaba isiqala ukungikhathaza nje,” kusho uHunt.
Ngaphambi kokufulathela iNingizimu Afrika izolo ebheke e-Addis Ababa, e-Ethiopia, umengameli weSafa uDanny Jordaan, oyozama isikhundla kuCaf uthe:
“Konke kuzocaca uma sengibuya ngomqeqeshi ngoba okwamanje izinto zisemapeketwane. Bakhona abaqeqeshi esixoxa nabo kodwa bacele ukuba banikwe ithuba baxoxe nalaba ababaqashile. Uma kunjalo-ke ngeke umane umemezele. Ngeke ukhiphe ngisho uhlu ngoba kukhona abazoqhatheka kulaba ababaholelayo njengamanje.”
IBafana izobhekana neGuinea Bissau emdlalweni wobungani eMoses Mabhida Stadium, ngoMashi 25. Kubukeka sengathi izoya kulo mdlalo ingakabi naye umqeqeshi.