KUMELE bashaywe amahloni abadlali be-Orlando Pirates ngendlela abavumele ngayo iFree State Stars ishaye amagoli egcine ibadle ngawo wonke angene ngesiwombe sokuqala emdlalweni we-Absa Premiership obuseJames Motlatsi Stadium ngempelasonto.
IPirates ihlulekile wukuqhubeka nesigqi ebigcine ngaso emasontweni amathathu edlule ihlula i-EC Bees edlala kuMotsepe League koweNedbank Cup Last 32.
Umphumela weBees ube yiwini yokuqala yeZimnyama ka-2017 kanti bese idlale imidlalo engu-12 ingawini.
Nokho konke ukuzethemba ngokubuyela ekunqobeni imidlalo kushabalele befica iStars ebingagayelwe mphako njengoba nayo izabalazela ukuphuma emaqenjini asengozini yokugawulwa yizembe.
IPirates eqeqeshwa uKjell Jonevret ithelwe othulini amagoli kaMoeketsi Sekola, Paulus Masehe noMahamed Anas. Umkhonto ugwaze ekhaya kunozinti weStars, uThela Ngobeni kwathi uTendai Ndoro washaya elesibili leBucs okube yiphenathi. Wonke amagoli kulo mdlalo angene esiwombeni sokuqala.
Ephawula kuSS4 ngemuva komdlalo uJonevret uthe usale emangele ngendlela udonga lwakhe oludedele ngayo amagoli.
“Ngimangele. Besingenelwa yigoli elilodwa kusukela ngifikile. Udonga lwethu belubukeka lungcono njengoba besisaqhubeka nokululungisa. Ngimangele kakhulu ngokwenzeke ngesiwombe sokuqala. Ngicabanga ukuthi akukubi ukuhlulwa ngo 1-0 kodwa akwamukelekile ukungenelwa amagoli amathathu ngama-free kick angaphusile. Angizange ngikholwe,” kusho Jonevret.
IPirates inethuba lokushesha iziphindiselele ku-Ea Lla Koto njengoba beqhathwe nayo kuLat 16 yeNedbank Cup. Umdlalo useJames Motlatsi ngoMgqibelo ngo-8.15 ebusuku.
“Emizuzwini emibili, emithathu yokuqala bengijabule ngoba besibabambile kodwa base bethola igoli. Uma ulibheka uyabona nje ukuthi iwumsangano indlela elingene ngayo. Kodwa siyayihlonipha iFree State ngithemba ukuthi abadlali bami bazoshaywa amahloni manje. Mina nethimba lami sizobuyela ekhaya siyosebenza. Ngithemba ukuthi uma sesibuya ngoMgqibelo ozayo sizoba nomdlalo ongcono,” kusho uJonevret.
Umqeqeshi weStars, uSerame Letsoaka, ubekushilo ngaphambi komdlalo ukuthi alikho iqembu elingashayeki.
“Ngincoma abadlali bami ngendlela abazinikele ngayo. Besingenza kancono esiwombeni sokuqala kodwa ngiyawajabulela amaphuzu amathathu akukhathalekile ukuthi atholakale kanjani,” kusho uLetsoaka.