UKUNGAGAYELWA mphako kwe-Cape Town City selokhu kuqale isizini nokuqubule imbuzo kuthele izithelo zokubizelwa kwabadlali bayo ababili asebeke balahliswa okwenyongo yenyathi amaqembu abebedlala kuwo kwi-Absa Premiership.
Laba badlali nguLebogang Manyama noShu-Aib Walters ababoshelwe eqenjini leBafana Bafana elimenyezelwe ngu-Owen Da Gama, eSafa House, eGoli ngoLwesine ekuseni. Leli qembu lizodlala neGuniea Bissau eMoses Mabhida Stadium ngoMashi 25 ngo-3 ntambama.
Bobabili bebekwiMpumalanga Black Aces ngaphambi kokuguqulwa kwegama yaba iCapeTown City, ngemuva kokuthengwa ilungelo layo lokudlala
kwi-Absa Premiership nguJohn Comitis.
Bahlangana kwiBlack Aces ngemuva kokuchithwa ngamaqembu ababedlala kuwona ngoba benuka iqaqa.
UManyama (26), wayelahlwe yiSuperSport United ngaphansi kukaGordon Igesund owayecija Amatsatsantsa ngaleso sikhathi. UWalters owayekwiBafana kwiFifa 2010 World Cup edlalele kuleli wayekade ekhonjwe indlela kwiMaritzburg United ngaphansi kwesizathu sokungaziphathi njengomdlali osemnkantshubomvu.
UManyama ungomunye wabadlali kwiPSL okubhekeke ukuthi akhale emuke nesicoco somdlali ohlohle amagoli amaningi ngokuphela kwesizini.
Ubambene phezulu noTendai Ndoro we-Orlando Pirates ngokushaya amagoli awu-11 umdlali ngamunye selokhu kusombuluke isizini ka-2016/17.
Lo mdlali odabuka e-Alexander Township, eGoli, ogcine ukubizelwa eqenjini lesizwe ngo-2013 lapho adlala khona neNigeria neBurkina Faso, utshele iGoal.com ukuthi leli thuba uzolibanga ngazo zombili ngoba kungenxa yokusebenza kwakhe ngokuzikhandla ngale sizini.
“Ngizogxila emsebenzini engiqashelwe wona okunye kuzo zenzekela. Akukho okunye engikucabangayo ngaphandle kokuthi ngiyokwenza isiqiniseko sokuthi ngizibekela indawo yami unomphela kwiBafana Bafana,” kusho uManyama ogcine ukudlala kwiBafana iyibambe kwiCosafa Cup eyayiseRoyal Bafokeng ngo 2015.
Limi kanje selilonke iqembu:
Onozinti: Itumeleng Khune, Darren Keet noShu-Aib Walters.
Abasemuva: Ramahlwe Mphahlele, Rivaldo Coetzee, Thulani Hlatshwayo, Erick Mathoho, Lorenzo Gordinho, Diamond Thopola noTebogo Langerman,
Abasesiswini: Hlompho Kekana, Thabo Mnyamane, Keagan Dolly, Andle Jali, Kamohelo Mokotjo, Tiyani Mabunda, Dean Furman noThemba Zwane.
Abagadli: Thulani Sereero, Percy Tau, Lebogang Manyama. Phakamani Mahlambi, Lars Veldwjik , Kermit Erasmus noLuther Singh.