IZOTHWALA kanzima i-Orlando Pirates ebuya ngenqwaba yemidlalo enzima ye-Absa Premiership ngenyanga ezayo.
NgoFebhuwari 3, eZimnyama zizodudulana neBidvest Wits e-Ellis Park ngo-8 ebusuku bese kuthi ngoFebhuwari 8 zishukane nePlatinum Stars eRoyal Bafokeng Stadium, eNorth West.
Ngemuva kwalo mdlalo iBucs izobhuquzisana neMamelodi Sundowns eLoftus Versfeld Stadium, ePitoli. Kuzothi kusenjalo ngoFebhuwari 15 itholane neWits e-Orlando Stadium, eSoweto, eGoli. NgoFebhuwari 18, izobhekana nomqeqeshi wayo omdala * -Eric Tinkler osecija iCape Town City eCape Town Stadium. UTinkler ubeshayela umkhumbi weZimnyama ngesizini edlule.
Usezakhele igama ngokuthela othulini abaqeqeshi abahlonishwayo eNingizimu Afrika. Uqumbe phansi uPitso “Jingles” Mosimane weSundowns, Steve “Mphathi” Komphela weKaizer Chiefs, Stuart Baxter weSuperSport United noGavin Hunt weWits.
Ngemuva komdlalo weCity amaBhakabhaka azodlala nePolokwane City e-Orlando ngoFebhuwari 25. Lo mdlalo uzolandelwa ngabazowudlala neChiefs ngoMashi 4 eFNB Stadium.
Lokhu kuchaza ukuthi eZimnyama zizodlala imidlalo eyisithupha ngoFebhuwari ezinsukwini ezingu-20. Leli qembu alizange lenze kahle emzuliswaneni wokuqala. Livale lihlezi endaweni ka-10 ku-log ngamaphuzu angu-18 emidlalweni engu-13.
Lihlukaniswe amaphuzu ayisikhombisa neSuperSport eqhwakele ngamaphuzu angu-25. IPirates kulindeleke ukuthi imemezele uGiovani Solanis njengomqeqeshi wayo omusha. Lo mqeqeshi usanda kusula isigubhukane kuFree State Stars abeyilolonga.
U-Augusto “Njenje” Palacios usabambe izintambo. IPirates ishiywe nguMuhsin Ertugral phakathi nesizini. Lo mqeqeshi odabuka eTurkey walotsholwa yiSuperSport United ngo 6-1 ngemuva kwalokho wakhonjwa indlela.
Isiyonke imidlalo yokuqala ye-Absa Premiership imi kanje:
NgoFebhuwari 3:
Bidvest Wits v Orlando Pirates (Ellis Park, 8pm)
NgoFebhuwari 7:
Kaizer Chiefs v Free State Stars (FNB Stadium, 7.30pm); Bidvest Wits v Ajax Cape Town (Bidvest Stadium, 7.30pm); Cape Town City v Highlands Park (Cape Town Stadium, 7.30pm); Chippa United v Baroka (Nelson Mandela Bay Stadium, 7.30pm)
NgoFebhuwari 8:
SuperSport United v Golden Arrows (Lucas Moripe Stadium, 7.30pm); Ajax Cape Town v Cape Town City (Cape Town Stadium, 7.30pm); Polokwane City v Maritzburg United (Old Peter Mokaba Stadium, 7.30pm)