UKHATHAZWA eyokugqoza kwamagoli eqenjini lakhe umqeqeshi weMamelodi Sundowns, uPitso Mosimane, njengoba sebehluleke kulandelana wukuqoqa amaphuzu emidlalweni abebesalele ngayo emuva kwamanye amaqembu ku-Absa Premiership.
UMosimane uveze lokho ngemuva kokuthi labo mpetha banyakenye beligi bephinde bahluleka wukuqoqa amaphuzu emdlalweni weligi ngempelasonto beguqiswa yiKaizer Chiefs ngo-2-1.
Lona bekuwumdlalo wesine kuligi amaBrazilians ehluleka wukuqoqa amaphuzu. Okusho ukuthi emidlalweni emine abebengathatha kuyona amaphuzu angu-12 basakwaze ukuqoqa amabili kuphela.
ISundowns idlale ngokulingana neChippa United ngo-0-0, yashaywa iCape Town City ngo-1-0, yabelana ngamaphuzu nePolokwane City kuba ngu-0-0 yase ishaywa iChiefs. Igcine ukunqoba umdlalo ithela phansi iBidvest Wits ngo-2-0.
Le miphumela emibi isho ukuthi kumele nakanjani labo mpetha bavuke bazithathe uma sebetholene neBloemfontein Celtic namuhla.
Umdlalo useLucas Moripe Stadium, ePitoli ngo-7.30 ebusuku.
“Iqiniso wukuthi silahle amaphuzu emidlalweni emine edlule. Into ekhona siyawakha amathuba kodwa asiwashayi amagoli. Ngeke ngithi angigculisekile ngeqembu lami kodwa kuyangikhathaza ukuthi uma sesifika phambili asiwasebenzisi amathuba ethu. Ngethemba ukuthi sizofunda kulokhu osekwenzekile siqhubekele phambili,” kusho uMosimane ngemuva komdlalo weChiefs.
AmaBrazilians ayibambe endaweni yesihlanu ku-log ngamaphuzu angu-34. Uma enqoba azobambana ngamaphuzu neSuperSport United esendaweni yesine ngawu-37. Kuzomele leli qembu likaMosimane lingabe lisabheka emuva noma selidlala nawo Amatsatsantsa a Pitori ngo-Ephreli 13 kwazise nemidlalo elisele ngayo emuva iya ngokuncipha.
“Ukuhlulwa kwethu (yiChiefs) akusho ukuthi sekuphelile ngathi ngokunqoba isicoco seligi,” kusho uMosimane.
ISundowns, ephinde ilinyalelwe abadlali yize kuyinto uMosimane athe ngeke avike ngayo, kusazoyishubela njengoba inemiqhudelwano emithathu eyibambe kuyona. Ngaphezu kokulwela ukuvikela isicoco se-Absa Premiership, ivikela eseCAF Champions League esingene esigabeni samaqoqo kuyona. Kukhona neNedbank Cup lapho bezodlala neLamontville Golden Arrows ngoMgqibelo esigabeni seLast 16. KuCeltic iDowns izohlangana neqembu eliwadingayo amaphuzu kwazise ifuna ukuqhela emaqenjini abhekene nezembe. Ngempelasonto iPhunya Sele Sele ibuye namaphuzu agcwele kuPolokwane City.