UMCULI ophinde abe nguphrojosa we-R&B e-United States, uRobin Thicke, uzocula okokuqala ngqa kuleli njengoba ezoba yingxenye yabazonandisa kuma-ANN7 South African of the Year Awards (SATY) azobe eseTicketPro Dome, eGoli, ngoNovemba 25.
Basalokhu beqhubekile nokuphuma bengena kuleli abaculi bapheshaya nonyaka kanti noRobin Thicke uzojoyina inqwaba yabaculi asebehambele iNingizimu Afrika kanjalo nabasazoza okubalwa kubo nomrepha uFuture ozobe ezonandisa kumaMTV Afrika Music Awards.
UThicke (39), ozakhele udumo ngeculo iLost Without You, ungomunye wabaculi abahlonishwa umhlaba wonke.
Lo mculi ofunde ukudlala ipiano eneminyaka engu-16 uzakhele udumo eneminyaka engu-21 ebhala aphinde aphrojuse umculo wamaciko okubalwa kuwo uMichael Jakson, Marc Anthony, Usher nabanye.
Kusukela lapho uqhube waqhulula amaculo akhe amenze wahlonishwa okubalwa kuwo iMagic, Complicated neBlurred Lines ayishaye noT.I.
AmaSATY, asungulwe ngo-2014, abahleli bawo bathi bahlela ukuthi alokhu ekhula njalo minyaka yonke.
Ngonyaka odlule abeshaya ngesihlabani saphesheya esicula i-R&B ne-pop, uJason Derulo.
Njengoba lo mculi engathakaselwanga ngabaningi ngonyaka odlule kuzoba nokuthemba ukuthi uThicke uzokuguqula lokho.
Nonyaka kulo mcimbi kuzobe kutholene phezulu izinkunzi eminxeni ehlukahlukene ebikiwe.
Emnxeni wePersonality of the Year kuzobhekana uBobby van Jaarsveld, Bonang Matheba, Katlego Maboe, Jay Anstey, Robert Marawa, noThato Molamu.
Enye indondo ezobe ibhekwe ngabomvu ngeyeSports Person of the Year emunxeni wayo okukhona uChad Le Clos, Elton Jantjies, Kagiso Rabada, Keegan Dolly, Luvo Manyongo, Shaun Keeling, Laurence Brittain noWayde van Niekerk.
Kwindondo enkulu yeSouth African of the Year kuzobhekana uTerry Pheto, Black Coffee, Brian Molefe, Caster Semenya, Glen Mashinini noWayde van Niekerk.