intatheli yesolezwe
ABEZOKUSHUSHISWA koMphakathi, iNational Prosecuting Authority (NPA), babophezelekile ngokomthetho ukuba bashushise uMengameli Jacob Zuma (osesithombeni) kulandela isinqumo seNkantolo eNkulu eNorth Gauteng ngeledlule ebeke eceleni isinqumo sango-2009 sokuhoxisa amacala angu-783 okukhwabanisa, inkohlakalo nokuthola imali ngokungemthetho abekwa wona. Lokhu kushiwo iDemocratic Alliance (DA) izolo.
I-DA ekwazile ukuthola imvume yokuthi kubuyekezwe isinqumo sango-2009 sokuhoxisa amacala, ithe ngokuthola iziyalo kubameli, kucacile ukuthi amacala “asezivukele wona kabusha”.
“Sihlangene nabameli basicebisa ngasohlangothini lwezomthetho, nangokubuyekeza isinqumo sangesonto eledlule seNkantolo eNkulu yaseNorth Gauteng. Kucacile ukuthi amacala ahoxiswa ngendlela eyiphutha, kwakungafanele ahoxiswe yiNPA ngo-2009,” kusho uMnuz James Selfe we-DA.
Uthe manje la macala sekufana nokuthi asevuke kabusha ngaphandle kokuthi iNPA inqume. Uthe uMqondisi wezokuShushisa u-Advocate Shaun Abrahams, umelwe wumsebenzi wokumshushisa uZuma.
Ungoti kwezomthethosisekelo uProf Pierre de Vos uthe isinqumo seNkantolo eNkulu sashiya iNPA nokubili okwakucacile engakwenza, okuwukuthi ishushise uZuma kumbe idlulise isinqumo esikhishwe ngoLwesine olwedlule.
“Ngesikhathi iNkantolo eNkulu yaseNorth Gauteng isichitha njengesingekho isinqumo sowayebambe njengomqondisi wezokushushisa sokungaqhubeki nokushushisa uZuma ngamacala enkohlakalo nokukhwabanisa, isinqumo sokuqala sokuthola uZuma enamacala sabuyiswa,” kusho uDe Vos ebhala umbono wakhe kwi-blog yakhe i Constitutionally Speaking, izolo.
Uthe: “INPA njengamanje ngokomthetho inemvume futhi inesibopho sokuthi imbeke amacala uZuma ngaphandle uma sedluliswa isinqumo.”
Amacala ahoxiswa ngaphambi kokuba kube nokhetho lukazwelonke ngo-2009, okuyinto eyavumela uZuma ukuba akwazi ukuqokwa njengoMengameli wezwe.
INkantolo eNkulu yathola ukuthi izizathu ezabekwa ngu-Advocate Mokotedi Mpshe, zokuhoxisa amacala, kungenzeka ukuthi zazinenhlese yezepolitiki.