I-Egypt izophinde iphuthelwe yi-Africa Cup of Nations

MALIBONGWE MDLETSHE

IZOBE ingekho futhi i-Egypt kwi-Africa Cup of Nations ka-2013 ezobe isingethwe yiNingizimu Afrika kusukela ngoJanuwari wonyaka ozayo.

OFaro bazoshweba i-Afcon yesibili kulandelana kwazise nakweyakulo nyaka ebisingethwe ngokuhla-nganyela yiGabon ne-Equatorial Guinea bebengabo-nwa neCameroon, Nigeria, neBafana Bafana.

Amaphupho e-Egypt okubuyisa isithunzi e-Afrika aqedwe yiCentral Africa Republic eboshelwe eqoqweni elilodwa neBafana Bafana emidlalweni yokuhlungela iNdebe yoMhlaba eseBrazil ngo-2014.

ICentral Africa iyishaye ngo 4-3 i-Egypt sekuhlanganiswe yomibili imilenze yokuhlunga.

OFaro badlale ngokulingana (1-1) neCentral Africa ekuhambeni kanti emdlalweni wokuqala abawudlalela ekhaya bashaywa ngo 3-2.

Nokho kubukeka sengathi iNigeria neCameroon abezukulengela eweni elifanayo njengoba bona sebedlulele esigabeni esilandelayo sokuhlunga lapho abajoyinwe khona yiCentral Africa.

NgoLwesine e-Emperors Palace eKurhuleni kuzoqhathwa amaqembu angu-30 azoshukana esigabeni sokugcina sokuhlungela ukuza kuleli ngonyaka ozayo.

Lesi sigaba sizodlalwa imilenze emibili ekhaya nasekuhambeni ngoSepthemba nango-Okthoba.

Kula maqembu angu-30 sekuvele kukhona la angu-16 abhuquziswe yiZambia e-Quatorial Guinea naseGabon ngoJanuwari.

ICentral Africa Republic ijoyine amaqembu angu-13 azoqhathwa nalawa angu-16.

Amazwe ajoyinwe yiCentral Africa Republic yi-Algeria, Benin, Cameroon, Cap Verde, Liberia, Malawi, Mozambique, Nigeria, Uganda, Democratic Republic of Congo, Sierra Leone, Togo neZimbabwe esabhekene nezinsolo zokuthengisa imidlalo osekudume nge-Asiagate Scandal okuthinteka kuyo uThomas Sweswe noMethod Mwanjale nabanye.

INigeria idlulele kulesi sigaba ngokuthi ishaye iRwanda ngo 2-0 sekuhlanganiswe imilenze yomibili kanti nayo iCameroon idlule ngokuguqisa iGuinea Bissau ngo 2-0 sekuhlanganisiwe kalandela ukunqoba ngo 1-0 kuyo yomibili imilenze.

Ukufadalala koFaro kuyisulubezi elikhulu ebholeni lase-Afrika kwazise isike yaqopha umlando iyinqoba kayisikhombisa i-Afcon.

Leli zwe lasenhla ne-Afrika liqophe irekhodi liyinqoba kathathu kulandelana i-Afcon ngo-2006, 2008 nango-2010.

Nokho kumele kududuze okuvezwe yiCaf ukuthi umqhudelwano wakulo nyaka ubukwe ngabantu abangu-6.6 Billion kuTV phezu kokuba ibingekho i-Egypt, Nigeria, Cameroon nelakuleli.

Amazwe azodlala kuleli ngonyaka ozayo azoqhathwa eThekwini ngo-Okthoba 26.