I-V40 nobuchwepheshe bokuvikela

Comment on this story
no pede

SIMPHIWE NGUBANE

UKUBA nama-sensor ayisikhombisa, ubuxhakaxhaka besimanjemanje nonyazi lwe-airbag kwenze iVolvo Car Corporation yaba yinkampani yokuqala emhlabeni ukwenza lobu buciko obusezingeni eliphezulu.

Lezi ngezinye zezinto ezitholakala emotweni entsha yale nkampani i-Volvo V40 equkethe lolu hlobo le-airbag, olwaziwa nge-Pedestrian Airbag Technology.

Izingozi zomgwaqo ezibalelwa ku-25% eChina zimbandakanya abantu abahamba ngezinyawo. Ezwenikazi i-Europe balinganiselwa ku-14% bese kuthi eMelika babengu-12%. Isibalo sabantu abalimalayo sikhulu kunesabafayo. Isibalo esiphezulu sezingozi zomgwaqo okulimala kuzo abantu emakhanda sidalwa yisakhiwo semoto esiqinile esingaphansi kwe-bonnet panel, unqenqema oluphansi le-windscreen nama-A pillars.

Lena ngenye yezinto iVolvo Car Corporation eqale yazibheka ngaphambi kokwakha i-Pedestrian Airbag Technology. Lobu buchwepheshe bubonakale ngesikhathi kwethulwa iVolvo V40 eGeneva ekuqaleni konyaka. Le moto esanda kwethulwa igabe nge-five-door hatchback esesitayeleni, iyi-sport futhi iphethe ubukhazikhazi base-Scandinavia

Ngokusho kukaMnuz Thomas Broberg, i-Senior Technical Advisor Safety kwa-Volvo uthe: “Siyazigqaja ngokuthi sakhe imoto ene-airbag yabantu abahamba ngezinyawo. Inhlosongqangi ngokwakha kwethu le-airbag wukuthi sivikele abahamba ngezinyawo ezehlakalweni ezithile uma bembandakanyeka engozini yemoto ukuthi bangalimli ekhanda.”

Lama-sensor ayisikhombisa afakwe ngaphambili ku-bonnet yale moto enziwe ngendlela yokuthi akwazi ukuthumela ngokushesha umyalezo kwi-control unit.

Ngaphambi kokuthi imoto ishayise noma yini kunezimpawu ezishintsha ngokushesha.

Kungalesi sikhathi-ke lapho ama-airbags avele aphume khona ngokushesha ezwa ukuthi lokhu azokushayisa ngunyawo lomuntu.

IKHUPHULA I-BONNET NGO-10 CENTIMETRES

Ihhuku le-bonnet ngalinye elilekelelwa yi-pyrotechnical release mechanism, livele libhoncule ophini bese lidedela ingemuva le-bonnet ngokushesha. Ngalesi sikhathi, i-airbag esuke isebenza ivele igcwalise ngokushesha umoya. Ngesikhathi sokuyigcwalisa komoya, i-airbag ifukula i-bonnet. Iyikhuphula ngama-centimetre angu-10 ihlale kanjalo kule ndawo.

UBroberg uthi le-airbag inemisebezi emibili emqoka. Umsebenzi wokuqala ngowokuthi ifukule i-bonnet ivule isikhala, owesibili owokuvimba indawo engezansi ku-windscreen ukuze umuntu angalimali uma etholana phezulu nayo.

Uma isigcwele umoya, i-airbag imboza yonke i-windscreen wiper recess. Lokhu kwenza ukuthi angaphazamiseki umshayeli akwazi ukubona lapho eyakhona. Konke lokhu kuthatha amasekhondi ambalwa kwenzeka.

Kusetshenziswe imifanekiso yezinyawo eyakhiwe kuhlolwa le-airbag. Isebenza ngesivinini esiphakathi kuka-20 kuya ku-50km/h ukushesha kwayo. U-75% wezingozi ezimbandakanya abantu abasuke behamba ngezinyawo zithatha u-40km/h.

“Sakhe lobu buchwepheshe sisebenzisa imifanekiso nge-khompyutha nemilenze nekhanda okufana nokomuntu. Sisebenzise izindlela eziningi senza lolu cwaningo olube yimpumelelo,”kusho uBroberg.

Le airbag yakhiwe ngesikhwama esine-gas generator. Kuthatha isikhathi esingaphansi kwe-second ukuthi sigcwale ngesikhathi sengozi.

Akukhona okokuqala abakwaVolvo benza ubuchwepheshe obuvikela abantu abahamba ngezinyawo. Kuzokhumbuleka ukuthi ngo-2010 iVolvo Car Corporation yethule obunye ubuchwepheshe obaziwa nge-Pedestrian Detection. Lobu buchwepheshe bukwazi ukunqanda ingozi ingakenzeki ngesivinini esingafinyelela ku-35km/h uma umshayeli wemoto engakwazanga ukuyigwema ngesikhathi.

Lokhu kukwazi ukwehlisa ijubane le moto ngaphambi kokuthi kwenzeke ingozi.

Lena ngenye yezindlela zakwa-Volvo Car Corporation

yokunciphisa isibalo sezingozi zomgwaqo ezidlula nemiphefumulo yabantu abaningi.


sign up
 
 

Comment Guidelines



  1. Please read our comment guidelines.
  2. Login and register, if you haven’ t already.
  3. Write your comment in the block below and click (Post As)
  4. Has a comment offended you? Hover your mouse over the comment and wait until a small triangle appears on the right-hand side. Click triangle () and select "Flag as inappropriate". Our moderators will take action if need be.

  5. Verified email addresses: All users on Independent Media news sites are now required to have a verified email address before being allowed to comment on articles. You are only required to verify your email address once to have full access to commenting on articles. For more information please read our comment guidelines