ZAKHELE XABA noMINENHLE MKHIZE
U NOZINTI omusha weMaritzburg United, uGlenn Verbauwhede, akaziboni emataniswa nehlathi empilweni phezu kokuthatha isinqumo esinzima sokujoyina iTeam of Choice esemsileni we-log ye-Absa Premiership.
UVerbauwhede waseBelgium, owafika kuleli eminyakeni edlule ezodlalela iMamelodi Sundowns, ubingelelwe ngesibhaxu sika 3-2 asithelwe ngamaBrazilians emdlalweni we-Absa Premiership eHarry Gwala Stadium, eMgungundlovu, ngoMgqibelo ebusuku.
Amagoli aweze iSundowns ashaywe nguHlompho Kekana amabili nelikaKhama Billiat angene esiwombeni ngasinye. AweTeam of Choice, ebikade isilandela ngemuva ngo 3-0, ashaywe ngu-Evans Rusike noBrian Onyango.
Emizameni yokuvika izembe, iMaritzburg ingene yagxila emakethe. Ngaphandle kukaVerbauwhede, isayinise umdlali wasemuva uTumelo Mogapi nomgadli uGregory Maasdorp. Bobathathu laba badlali babosheliwe ngumqeqeshi u-Ernst Middendorp ngempelasonto.
Phezu kokuba abadlali abaningi behlale becabanga kaningi ngaphambi kokujoyina iqembu elisengozini yezembe ngenxa yokusabela ukubalwa nabalifaka ehlathini kodwa uVerbauwhede akaziboni engena kuleyo nkinga.
“Ngithanda inselelo ehambisana nethuba. Ngiyakholwa ukuthi iMaritzburg izohlala kuPremiership, sizokulwela lokho. Ngeke kube lula ngoba kunemidlalo enzima engu-15 esihlalele. Ekugcineni uma sisinda kulokhu ngeke siphinde sibe nesizini efana nalena. Angifuni ukufaka indaba yokudliwa yizembe ku-CV yami. Bonke abadlali bafisa lokho ngoba sifuna ukulwela isithunzi sethu,” kusho uVerbauwhede.
“Ngebhadi, kufanele ngikhulume iqiniso, angizange ngiphumelele kuSundowns ngenxa yokuthi ngalimala izinyanga ezingu-11 nokwaholela ekutheni ngingasitholi isikimu. Nokubolekiswa kuFree State Stars akuzange kusebenze emuva kwezinto ezingafezwanga. KuMaritzburg ngifuna ukukhokhela umqeqeshi ngokuthi ngidlale kahle nosihlalo ngoba uyena ongifune kakhulu wakhombisa ukungethemba.”
Phezu kokuba leli qembu lisahluleka ukuwina imidlalo kuPremiership kodwa abalandeli babukeka bengaliphonsile ithawula kwazise basayigcwalisa inkundla iHarry Gwala. Kusasa iTeam of Choice izovakashela iPolokwane City e-Old Peter Mokaba Stadium, ePolokwane emdlalweni wePremiership ozoba ngo-7.30 ebusuku. NgoMgqibelo ngo-6 ntambama izovakashela iKaizer Chiefs eFNB Stadium.
“Kufanele kube khona esikwenzela abalandeli. Emidlalweni yethu kuhlale obala ukuthi akusifanele ukuhlala emsileni. Uma ubone indlela esidlale ngayo sibhekene ne-Orlando Pirates, SuperSport United nokwenzeke namuhla (ngoMgqibelo) kuyakhombisa ukuthi asilona iqembu elifanelwe ukuhlala emsileni. Asikho endaweni ekahle kuligi kodwa izinto zizolunga,” kusho uVerbauwhede.