INLSA

Amaphoyisa kaMasipala ethule izikhalo zawo kwiMeya uMnuz James Nxumalo izolo ekhala phakathi kokunye nangabaphathi bawo. Isithombe: Patrick Mtolo

LUNGI LANGA

UMA kuphuma isinqumo angahambisani naso namuhla amaphoyisa kaMasipala weTheku asabisa ngokuthi azonxenxa nezinye izinhlangano ukuba zingenele isiteleka sawo sokufuna kushintshwe abaphathi kuqashwe nabantu ngokugcwele.

Emashini yayizolo amaphoyisa kamasipala angaphansi kwenyunyana iSouth African Municipal Workers Union (SAMWU) athi ngeke aphele amandla uma izimfuno zawo zingaphumeleli.

Ngonyaka odlule acela ukuthi kumiswe abaphathi bawo okungo Mnuz Rajen Chin ongumphathi wophiko olukhethekile emaphoyiseni, uMnu Monty Naidoo, owengamele ukuqashwa emaphoyiseni noMnuz Eugene Nzama ophethe amaphoyisa ngoba bebasola ngokungaphathi ngendlela kulezi zikhundla abakuzo.

Amaphoyisa athi afuna uMasipala uthathe izinyathelo ezinqala ngoChin noNzama ngokuvumela ukuthi izimoto zikahulumeni zisetshenziswe ngendlela engekho emthethweni.

Ngaphezu kwalokhu agxeka abaphathi ngokuvumela amanye amaphoyisa ukuba asebenzise izimoto zikamasipala ukufeza izidingo zasemakhaya.

Ngesikhathi efunda uhlu lwezikhalazo uMnzu Nhlanhla Nyandeni weSAMWU, uthe ngaphandle kwalokhu bafuna kubhekwe udaba lwamaphoyisa asesebenze iminyaka engaphezu kwemihlanu eyitoho. Ohlwini lwezikhalo basole uNzama ngokuthi akabonakali enolwazi lokuphatha amaphoyisa kaMasipala.

Yamukela izikhalo zabo iMeya yeTheku, uMnuz James Nxumalo, izwakalise ukuzwelana nabo yathi izobiza umhlangano ophuthumayo nekomiti eliphethe uMasipala.

“Sizohlangana nobuholi bukaMasipala ukuze sidingide lezi zikhalo bese sisheshe sinazisa ukuthi yiziphi izinqumo esizithathile,” kusho uNxumalo.

Namuhla amaphoyisa azozwa ukuthi uMasipala uthathe siphi isinqumo ngezikhalo zawo.

Ngesikhathi emasha athole ukwesekwa okukhulu yizinhlangano okubalwa kuzo iCongress of South African Trade Unions ne-ANC Youth League.