THOKOZANI NDLOVU
K USHUBE isimo eNkantolo eNkulu eThekwini izolo ngesikhathi kuvezwa ukuthi isandla soThingo encwadini yefa sihluke ngezinto ezingu-24 uma kuqhathaniswa nezinye izincwadi olwazisayina.
Lo mehluko okuthiwa utholwe nguchwepheshe wesibili oqashwe ngabaseBuhleni uColonel Frik Landman uvezwe ngummeli walolu hlangothi u-Advocate Rajesh Choudree ngesikhathi epheka uchwepheshe uMichael Irving ngemibuzo. Lokhu kulandela ukuthi u-Irving eveze ukuthi incwadi yefa eyasayinwa ngoFebhuwari 2000 ekhomba uMnuz Vela Shembe njengomholi olandelayo weNazareth Baptist Church ihlobene ngezinto ezingu-27 nabeyiqhathanisa nazo eziyisithupha.
IJaji u-Achmat Naaim Jappie lithe ukufana nokungafani okutholwa ngochwepheshe kule ncwadi konke kubalulekile ngakho akukho okuzobukelwa phansi.
Lezi zindaba kube ngezehla kahle kwabaseBuhleni njengoba injabulo ibibhalwe ebusweni ngesikhathi zivela.
Kungakapholi maseko kusavele lezi zindaba kusukume ummeli wohlangothi lwaseThembezinhle u-Advocate Achie Findlay waphonsa u-Irving imibuzo efuna acacise ngomehluko otholakala uma kuhlolwa isandla somuntu.
U-Irving akachithanga sikhathi wadonsa amaphepha abephambi kwakhe ecacisa ngokwehlukana kwesandla ngesikhathi uThingo lusayina ezincwadini ezahlukene.
“Ukutholakala komehluko ezincwadini ezahlukene ezisayinwe ngumuntu oyedwa yinto ejwayelekile. Ngiphinde ngaqhathanisa isandla soThingo ezincwadini eziyisithupha ezingangatshwazwa ukuthi zasayinwa wuThingo. Ngithole ukuthi enye ihluke ngezinto ezingu-23 kwenye. Lokhu akusho ukuthi akuyona njengoba wonke umuntu azi ukuthi zasayinwa wuThingo uqobo. Kwenye ngithole izinto ezingu-22, enye-21, 23, 22 eyokugcina ihluke ngezingu-25,” kusho u-Irving.
Ezinye izinhlamvu ezisesibongweni uShembe lapho kwasayina khona uThingo yizona ebezishayisa amakhala nokutholakale kuzo umehluko. U-Irving uthe indlela azibone ngayo nafundiswe ngayo ukuzihlola ikhomba ukuthi zingumhlambi wandawonye nalezi ezingangatshazwa. Wathi ukungafani kwazo kungokwejwayelekile okungenzeka kunoma ngubani ngenxa yesimo umuntu asayina engaphansi kwaso esingadalwa ukukhula noma ukugula.
Wathi ngokombiko wakhe akukho akungabazayo, waphinde wakhomba ngenjumbane umbiko kaColonel Landman athe kukhona lapho kushoda khona ngawo futhi akawukholwa nakancane.
Leli cala kulindeleke ukuthi liqhubeke ngoSepthemba 26. Kulindeleke ukuthi kungene uchwepheshe wesibili njengoba u-Irving ephothulile ukufakaza izolo.