.

UZOQOPHA umlando uCandy Mavundla ngokuba ngowesi-fazane wokuqala ukungenela iDusi. Isithombe: SITHUNYELWE

USEKUBHEKE ngabomvu ukuqopha umlando owesifazane ozoba ngowokuqala omnyama ukungenela umjaho i-Unlimited Dusi Marathon kulo nyaka esigabeni sabagwedli abakhokhelwayo.

UCandy Mavundla (17), waseMbali, eMgungundlovu uthe uthando lwalo mdlalo lwenza aqunge isibindi angenele lo mjaho yize uyingozi.

“Ngijabulile kodwa ngithukile. Kuyingozi kakhulu ukudlala lo mdlalo kodwa ngoba ngilangazelela ukuhluka ngizoqunga isibindi. Okungijabulisa kakhulu wukuthi ngizoba ngowesifazane omnyama wokuqala ukungenela i-Dusi,” kusho uCandy.

Lo mgwedli uthe phakathi kwemidlalo eminingi azifela ngayo wabona kuyinselelo ukuthi akekho ozijubayo angenele lo mdlalo odume kakhulu kwabamhlophe.

“Ngabona isikhala esikhulu kulo mdlalo. Abantu abaningi besifazane abazimisele ukuqunga isibindi, bayesaba ukungena emanzini,” kusho yena.

Le ntokazi izobe igwedla noNombuso Mzolo naye ozobe eqala ngqa ukugwedla kwiDusi.

Umqeqeshi wale ntokazi uJosta Oliphant uzishaya isifuba ngokufaka lezi zintokazi kwi-Dusi yize bebebhekene nezingqinamba eziningi.

“Kulukhuni kakhulu ukufundisa amantombazane ngoba kuningi esingenakho okunjengezinto zokuhamba nesikebhe esisesimweni esikahle. Sigwedla nasedamini elincane elenza bangakwazi ukuzilungiselela kahle,” kusho yena.

Lo mqeqeshi uthe yize kukuningi akhala ngakho kodwa ulindele ukuba lezi zintokazi zenze ezibukwayo.

“Bayazimisela kakhulu, okwenza ngingangabazi ukuthi bazokwenza kahle. Silindele lukhulu kubona, ukuphakamisa igama labesimame kulo mdlalo,” kusho yena.

Cishe lo mqhudelwano walo nyaka uzobe ubhekwe kakhulu njengoba kukuningi okuzobe kuqala ukwenzeka.

UMichael Mbanjwa ongumuntu wokuqala omnyama ukudla umhlanganiso kulo mjaho njengoba aqala ukuwina ehambisana noMartin Dreyer, kulokhu uzobe ehambisana noSibonelo Zondi. Uma benqoba lokhu kuyosho ukuthi bangabantu abamnyama bokuqala ukunqoba iDusi begwedla bobabili.

Lo mjaho uzosuka eMgungundlovu uphelele eBlue Lagoon eThekwini ngoFebhuwari 16-18.