Isilo sihlela umthandazo wokushweleza

Comment on this story
NO silo1 INLSA Isilo samabandla uZwelithini kaBhekuzulu ngesikhatghi sihlangene nabantwana baseNdlunkulu ngoMgqibelo esigodlweni saseNyokeni. Eduze kwaso uMntwana uPhilemon noMntwana uMbonisi. ISITHOMBE: PATRICK MTOLO

CELANI SIKHAKHANE

ISILO samabandla sesikubeke kwacaca ukuthi sifuna kube nomkhuleko ozogxila ekutheni kuthandazelwe izinkinga ezifana nokwanda kokudlwengulwa kwezalukazi nokuthandana kwabantu bobulili obufanayo ngoba uMvelingqangi kuyaziwa ukuthi izinto angahambisani nazo lezi.

Lokhu sikusho ngesikhathi sihlangene nabantwana baseNdlunkulu kaZulu emhlanganweni obusesigodlweni esikwaNongoma eNyokeni lapho bekuzobhungwa ngamasu okuzama ukushweleza ngezigameko ezimise kabi elakuleli nezihlupha umphakathi.

Kulo mhlangano kulapho iNdlunkulu ivumelane neSilo ngokuthi kuyomele kube nomthandazo omkhulu oyoqala mhlaka 25 kuya ku 28 Disemba ukuze kugezwe isizwe sonkana ngezinkinga ezisikhungethe.

Phakathi kwezinye izinto ebesikhala ngazo kubalwa udlame lwezepolitiki, olwamatekisi, ukuhushulwa kwezisu nezingane ezilahlwa ziphila, nalabo ababayizisulu zodlame lwakudala.

“Angeke ngikhulume ngokunye ngoba kothiwa sengithe ngoba ngiyayazi into uNkulunkulu angayifuni kodwa nabo laba abathandana nobulili obufanayo siyabakhalela ngoba kungcolile abakwenza phambi kukaNkulunkulu akwemukeleki.

NO silo3 Ingxenye yabantwana baseNdlunkulu abebenomhlangano neSilo esigodlweni saseNyokeni, ngoMgqibelo. Isithombe: PATRICK MTOLO INLSA

“Njengenkosi yenu ngalolo suku ngiyosho ukuthi ngalo msebenzi ngithi kunina maZulu enaphakwa eNdlunkulu niyovikela isihlalo sobukhosi benu buyelani emakhaya niphumule ngokuthula nibe izingelosi ezinhle. Nalaba abasala odlameni lwezepolitiki nalaba bamatekisi ikakhulukazi lapha kwaNongoma ngiyosho ngithi yekani naningaphakiwe iNdlunkulu buyelani emakhaya imindeni iyanidinga udlame luphelile siyalugqiba kwaZulu, akuhambe konke okubi nomnikazi wakho uSathane.

“Nakulabo abasalola imikhonto ngiyothi ayihlale phansi ibambe umthetho ngoba sesidlulile leso sikhathi. Nakulabo abaklinywa onina besebancane, babafaka emigqonyeni ngiyosho ukuthi abalale ngokuthula. Nakulaba ababhizi nokudlwengula izalukazi nezingane ngiyosho ukuthi ngiyabashwelezela abayeke lento abayenzayo,” kusho uHlanga lomhlabathi.

Le nkulumo yeSilo inanelwe ngenkulu inhlokomo abantwana baseNdlunkulu abebephuma ezindlini ezahlukene ezibalelwa ku-21.

Phakathi kwabo bekukhona abaseHabeni, abakwaZulu, Manyanyeni, abaseGazini, abasoNkweni nabakwezinye izindlu zaseNdlunkulu.

Ngesikhathi sichaza iSilo sithe siyakholwa ukuthi uma kungenziwa lo mcimbi kuzoba khona umehluko odlameni nasezinkingeni ezikhungethe abantu baKwaZulu-Natal.

Sithe umkhosi waso wokweShwama ozoba kulo nyaka sifuna uhluke kakhulu ngoba ngaphambi kwawo kuyoqala uchungechunge lwemikhuleko yokugezwa kwendlunkulu iqunga nesizwe sonkana.


sign up
 
 

Comment Guidelines



  1. Please read our comment guidelines.
  2. Login and register, if you haven’ t already.
  3. Write your comment in the block below and click (Post As)
  4. Has a comment offended you? Hover your mouse over the comment and wait until a small triangle appears on the right-hand side. Click triangle () and select "Flag as inappropriate". Our moderators will take action if need be.