IZAMBIA isamile ekutheni umholi weDA kumele abonge nje ukuthi akaphoswanga etilongweni ngesenzo sakhe sokugqugquzela ukuthi izinkantolo zikhiphe umholi weqembu eliphikisayo osejele kuleliya lizwe.
NgoLwesine ebusuku uMnuz Mmusi Maimane uthole ukuphoxeka ngesikhathi ejikiswa eZambia engazange awubeke nomcondo wakhe emhlabathini kuleliya lizwe, okuyisenzo esesihlatshwe uMnyango wezangaPhandle kuleli.
Nokho omele iZambia uMnuz Emmanuel Mwamba uthi uMaimane uxoshelwe ukuthi ubefuna ukuphoqa izinkantolo ukuthi zikhulule uMnuz Haikande Hichilema weqembu eliphikisayo. UHichilema uboshelwe ukuthi wagoloza ukudedela ujenga lwezimoto zikahulumeni emgwaqeni. Usebhekene necala lokuzama "ukuketula umbuso."
Iqembu elibusayo iPatriotic Front eZambia lithe uMaimane uyizele ngobuso, wakhohlwa ukuthi eZambia umthetho uyasebenza. UMnyango wezangaPhandle kuleli ufuna incazelo ngalesi sigameko. Kuvela ukuthi bekukhona namaphoyisa aphethe izinhlokohlela zezibhamu angene ebhanoyini abekulo.
IZambia ithi usenza ihaba lesi sigameko uMaimane.-ANA