IZINWELE ezinempilo zibaluleke ukwedlula umzimba okhangayo, nokuba nemoto noma ukuya ocansini kubantu besifazane abasebancane abasezingeni eliphezulu.
Lokhu kuvezwe wucwaningo olwenziwe yisikhungo socwaningo iDkt Wolf Research kubantu besifazane abawu-1001 abaneminyaka ephakathi kuka-18 kuya ku-39 KwaZulu-Natal, eWestern Cape naseGauteng.
UDkt Adolf Klenk, inhloko yocwaningo, uthe izinto ezibalulekile kubantu besifazane okukhulunywe nabo kwenziwa ucwaningo wukuba nomndeni, kulandele ukuphila kahle emzimbeni, kulandela ukuba nomsebenzi oholela kahle, ukuba nemali kugcine ukuqoma.
Ukuba nezinwele ezinhle, ukuba neselula esezingeni eliphezulu ne-Internet kubaluleke ngendlela efanayo kulaba bantu besifazane. Ngemuva kwalokhu kulandela ukuzivocavoca, ukuba nomzimba okhangayo, imoto, okungabalulekile kangako kubona ukuzihlanganisa nokuya ocansini.
UDkt Klenk uthe olunye ucwaningo olwenziwe yinkampani ezimele lukhombise ukuthi * -60% wabantu besifazane abasebancane bayazidaya izinwele zabo; kungaba ukugqamisa umbala wemvelo wezinwele zabo noma ukufaka omunye umbala. U-60% wabo usebenzisa imithi ethile ukwelula izinwele zawo kanti * -43% uthe izinwele zawo ziyaqothuka.
Phakathi kwezinto abazibala njengezenza ukuthi izinwele zabo ziqothuke uDkt Klenk uthe babale ukhwantalala, ukusebenzisa imithi ekhanyisa isikhumba, imishanguzo yokwelapha izifo ezithile, ukugula, ufuzo, ukungasebenzi ngendlela kwama-hormones emzimbeni yabo, ukweluka, ingcindezi yomsebenzi noma ukudla okungenayo impilo.
UDkt Klenk ukuqinisekisile ukuthi izinto ezifana ne-caffeine, ukhwantalala, ukudla okungenampilo noma okungenazo izakhamzimba kungaholela ekutheni izinwele ziqothuke.