ISAZOQHUBEKA nokuqhuma inganono kubaholi be-ANC KwaZulu-Natal njengoba kubhekwe engqungqutheleni yokukhetha ubuholi kuzwelonke ezoba ngoDisemba eGoli kulo nyaka.
Lona wumbono womhlaziyi wezepolitiki wase-UKZN uSolwazi Lukhona Mnguni.
Lo mhlaziyi ubephefumula mayelana nesigameko sakamuva sokuhlaselwa kwamakhansela amathathu aseMzimkhulu abephuma emhlanganweni esenzeke ngoLwesine, e-Ibisi, eMzimkhulu.
Phakathi kwala makhansela bekukhona uMnuz Sindiso Magaqa oke waba nguNobhala-Jikelele we-ANCYL kuzwelonke oseyiPR kwa-ward 11, uNonsikelelo Mafa wakwa-ward 11 noJabu Mzizi wakwa-ward 16.
Kuthiwa basinde ngokulambisa kubalisa abangaziwa abebebadubula.
UMnguni exoxa naleli phephandaba uthe zimbili izinto ezidala uthuthuva esifundeni iHarry Gwala, yinkohlakalo kuMasipala iHarry Gwala nokubangwa kwezikhundla kwi-ANC.
"Kunokhetho lwesifunda oluzoba seHarry Gwala maduze, into eyenza ukuthi lubangwe lolu khetho wukuthi abazonqoba bazoya engqungqutheleni yokukhetha ubuholi bayophakamisa igama lozoba ngumengameli. Lesi sifunda siyikhaya likaDkt Nkosazana Dlamini Zuma osembangweni wesikhundla sobuholi."
UMnguni uthe amaphaphu aphezulu eHarry Gwala ngoba abaholi bakhona bafuna isifunda sabo sibe yibekankosi.
Uthe okunye okudala uthuthuva ukwehlukana phakathi kwabaholi balesi sifunda odabeni lwenkohlakalo.
"Abanye bayingxenye yenkohlakalo, abanye balwa nayo yingakho kuqhuma isibhamu. Umengameli uze wajuba ithimba eliphenya ngodaba lwenkohlakalo okuthiwa inuka phu kulesi sifunda. Ziningi izigameko zokuhlaselwa kosopolitiki ezisazoba khona kulo nyaka." kusho uSolwazi Mnguni.
Ebuzwa ngesixazululo sodungunyane uthe iqembu elibusayo kufanele lihlakule ukhula emagcekeni alo ukuze konke kuhambe kahle.
"Le nto kade ngiyichaza kwikhomishini kaMoerane ephenya ngokubulawa kosopolitiki esifundazweni. Izinto zonakele kuKhongolose, akuselona iqembu elilwela abantu. Abaholi sebelwela ukuzicebisa bona nabasondelene nabo, bakhohliwe yimigomo iqembu elasungulwa ngaphansi kwayo yokubeka abantu phambili," kuphetha uSolwazi Mnguni.