MHLENGI SHANGASE
EZEMFUNDO zithole isabelo esikhulu esabelweni sezimali esethulwe nguNgqongqoshe wezimali uMnuz Pravin Gordhan, izolo ePhalamende, eKapa.
Zabelwe u-R320 billion, ingxenye eningi yayo okungu-R216.7 billion iya emfundweni esemazingeni aphansi.
Amanyuvesi abelwe u-R31.6 billion, ukuthuthukisa makhono emanyuvesi abelwa u-R21.1 billion, isikhwama esixhasa abafundi ngezimali iNational Students' Financial Aid Scheme sabelwa u-R15.8 billion kwathi amakolishi ama-Technical Vocational Education and Training athola u-R7.4 billion.
UGordhan uthe bonke abafundi abahlwempu abaxhaswe yiNSFAS bazoxhaswa.
"Sengeze u-R5 billion emfundweni ephakeme eminyakeni emithathu ezayo. Abafundi abazali babo abahola u-R600 000 ngonyaka ngeke banyuselwe imali yokufunda emakolishi nasemanyuvesi kulo nyaka," kusho uGordhan.