USATHUTHUMELA umndeni waseMlaza eNingizimu yeTheku emuva kwesehlakalo sowesilisa ozigwaze wazibulala ebalekela umphakathi obumsola ngokubamba inkunzi kule ndawo.
Ngokusho komthombo owazibonela ngo “si” lesi sehlakalo okuthiwa senzeke ebusuku ngosuku lwezithandani ngoFebuwari 14 kulo nyaka, umufi ungene nezicabha emzini wakwaMntungwa kwa-C, eMlaza, ejahwa wumphakathi obumsola ngokubamba inkunzi emgwaqweni.
Umthombo uthe umufi ungene kulo muzi wabamba ingane yomfana eneminyaka ewu-16 wayivalela ethoyilethe maqede wabuya wasabisa owesifazane elingatholakalanga igama lakhe ohlala nalezi zingane ezintathu, obesethuthumela, ezama ukucela usizo komakhelwane.
“Ubuye ngoshova umufi endlini yokuphumula ezosabisa lo wesifazane obehleli nezingane ezimbili ena-11 no-8 ukuthi angalinge azame ukufona,” kusho umthombo.
Uthi kwenzeka lokhu nje kanti umphakathi umbonile ukuthi umufi ungene kwaMntungwa ezama ukucasha.
Unele wabona umphakathi uhlome uyizingovolo wavele wazigwaza inxeba elilodwa eduze kwenkaba, maqede wayalela lo wesifazane ukuthi avule umnyango, watotoba waphuma endlini, waphangalela egcekeni.
Umthombo uthe umphakathi uzame ukumtitinya ngenduku ungakaboni ukuthi useshonile.
“Lesi sehlo sizihlukumezile izingane ngoba azikutholanga nokwelulekwa ngokwezengqondo kanti nomama wakulo muzi ufuna umndeni kamufi uzogeza umuzi ngendlela yesiko njengoba eshonele egcekeni."
Okhulumela amaphoyisa KwaZulu-Natal esitatimendeni asithumelele leli phephandaba, usiqinisekisile lesi sigameko, wathi kuvulwe icala lokubulala ngalesi sigameko. Uthe umufi watholwa edindilizile emgwaqweni eceleni komuzi.