INLSA

Inkosi uMduduzi Shembe wasohlangothini lwaseBuhleni ngesukhathi eseTehuis eMlazi izolo ezothandazela abantu. ISITHOMBE PATRICK MTOLO

MLUNGISI GUMEDE

IZINKULUNGWANE zabalandeli bebandla iNazareth Baptist Church baseBuhleni izolo zikhandelane eTehuis eMlazi lapho umholi wazo iNkosi uMduduzi “Nyazi lweZulu” Shembe ebethandazela abagulayo nokubikwe ukuthi usukumise abantu abathathu abebehamba ngezihlalo zamasondo.

Lo mcimbi bekulindeleke ukuthi uhanjelwe yiMeya yeTheku uMnuz James Nxumalo kodwa akabange esaphumelela.

Ngaphandle kokusukumisa laba bantu, uNyazi kuthiwa luphinde lwathandazela uNksz Celekile Mbatha okuthiwa uphalaze inyoka. Intatheli ayizange izibonele lesi simanga kodwa izwe ngamanye amakholwa. Ithe noma ibuza ngenyoka kwangabakhona ophumela obala.

Omunye wezishosha kodwa ogcine esehamba, uNksz Nomusa Msomi waseMlazi, uthe ubesehambe ngesihlalo esinamasondo isikhathi eside ngemuva kokuphathwa wuvendle. manje kodwa usephinde wakwazi ukuzihambela.

“Ngibonga kakhulu eNkosini yamaNazaretha ngokungisiza yangisukumisa kulesi sihlalo,” kusho uNksz Msomi.

Izinkumbi zamalungu ebandla lakwaShembe zihlangane ngaseMega City eMlazi lapho inkosi yazo uMduduzi Shembe kade ethandazele khona abantu abagulayo Izithombe: PATRICK MTOLO

INLSA

Izolo uNyazi lubonakale kancane luthi shazi phakathi kwezinkulungwane zabalandeli balo.

Kuphazamisekile ukuhamba kwezimoto emgwaqweni uMangosuthu Highway izolo eduze nasehostela eTehuis ngesikhathi kunomhlangano waleli bandla.

Izinkulungwane zabalandeli zifike ziphethe izipho ezehlukene, okubalwa kuzo nenkunzi yenkomo zizonikela eNkosini yazo.

Ngesikhathi kusontwa eceleni bekuqhubeka umgidi. UMnuz Sihle Ncube obejutshwe ukuthi akhulume nabezindaba izolo, uthe yizwi likaNkulunkulu elitshele uNyazi ukuthi luzophilisa abantu eMlazi.

“Njalo uma uNkulunkulu ekhona ukhetha usuku asuke ezosiza ngalo abantu njengoba kwenzeka namhlanje,” kusho uNcube.

Uthe kusasa uNyazi luzohambela eGoli luyothandazela abagulayo. Uthe bazohambela nezinye izindawo nakhona beyosiza abantu.

AbaseBuhleni bagcine bengayinyukanga intaba iNhlangakazi kulo nyaka. Baphelela eHomisi ngenxa yombango osenkantolo mayelana nobuholi phakathi koNyazi neNkosi uVela Shembe waseThembezinhle.