INLSA

I-TKZEE ingelinye lamaqembu azonandisa kwindumezulu yekhonsathi okuzobe kucula kuyo isihlabani saseMelika u-Usher

ABACULI bakuleli abaziwayo bazothola ithuba lokubhulela amazolo isihlabani saphesheya kwezilwandle u-Usher Raymond e-Orlando Stadium eGoli ngoMashi 10.

Abehlelwe yile nhlanhla yokushiyelana inkundla no-Usher kwiHansa Pilsner Festival of Legends nguZakes Bantwini, Tkzee, Gang of Instrumentals, Liquideep, Teargas, Oskido, Vigilante, Capital noDJ Tira.

U-Usher akadingi kuchazwa, ungumculi owaziwayo we-R&B futhi waduma ekupheleni kweminyaka yo-1990.

Lo mculi oshaya ngezwi elimtoti waziwa kakhulu ngezingoma zakhe okubalwa kuzo ayishaya no-Alicia Keys ethi My Boo, Confessions, Yeah, You Remind Me, Love In This Club nezinye.

Kumanje izwi lakhe lizwakala eculweni likaDJ okleliswe waba ngowokuqala emhlabeni ngabeDJ Mag 100, uDavid Guetta, engomeni eshisa izikhotha ethi Without You.

IMenenja yakwaHansa Pilsner uMosidi Seretlo uthe bakhethe ukuhlanganyela nalaba baculi “abangeke bahluleke ukwenzela abantu usuku abangeke balukhohlwe”.

“IFestival of Legends iyingqayizivele yethuba kubaculi abasafufusa ngoba bacula esiteji esisodwa nesihlabani somculi ongomunye wabahamba phambili ngesikhathi sakhe kwi-R&B, u-Usher, ehambisana nabanye babaculi baseSouth Afrika abanethalente. AbakwaHansa bayaziqhenya ngokwenza lokhu,” kusho uSeretlo.

UDJ Tira uthe bazokwenza into yamehlo ukuze bakhombise u-Usher ukuthi umculo wakuleli nawo usezingeni eliphezulu.

Njengoba kunomncintiswano wabaculi abasafufusa abazobhulela amazolo lezi zihlabani, abafuna ukubavotela kuzomele bakwenze lokho lungakapheli olwanamhlanje ngoba wusuku lokugcina kanti abaphumelele bazomenyezelwa ngoLwesihlanu. Phakathi kwabaculi okukhethwa kubo kubalwa no-Abdus waseTshelimnyama ePinetown.