.

KULINDELEKE ukuthi kufundwe namhlanje eMdepha High, kwaXimba njengoba isigejana sabazali sahlasela uthishanhloko sithi uma engahambi kukhona okusina kumjeqeza. Umhlangano wabazali unqume ukuthi awusasifuni lesi sigejana esixova isikole

MHLENGI SHANGASE

BAMBALWA abafundi abebezofunda esikoleni sezingane eziphila nokukhubazeka iKhulangolwazi, eMontclair eThekwini ngemuva kodweshu abafundi becekela phansi ihhovisi likathishanhloko.

Abafundi bavuka umbhejazane ngoLwesihlanu baphihliza amawindi emahhovisi bekhala ngokushintshelwa uthisha wesiZulu.

NangoMsombuluko babuye bahlaphaza izincwadi kula mahhovisi bagodukiswa ngenxa yokuphinda basuse lolu dweshu.

Izolo okhulumela uMnyango wezeMfundo, uNksz Mbali Thusi uthe ukufunda kuqalile yize bebeyingcosana abebekhona.

Uthe kukhona ukungezwani phakathi kukathishanhloko nabanye othisha wathi yizinto umnyango oziphenyayo. Kuzoba nomhlangano wabazali namhlanje.

ABAFUNDI basesikoleni saseMontclair bavuka umbhejazane balimaza impahla yesikole ngesonto elidlule. Izithombe: SANDILE MAKHOBA

INLSA

Unobhala weSadtu egatsheni, iVictoria Mxenge, uMnuz Bonginkosi “BJ” Hadebe, uthe bebeyingcosana abafundi izolo wathi ukufunda nokufundisa ngeke kusheshe kubuyele esimweni esejwayalekile.

Uthe bekukhona ithimba lomnyango ebeliholwa nguMqondisi wesifunda saseMlazi, uMnuz Bheki Ntuli nethimba elisingethe uphenyo kulesi sikole.

“Sifuna kuyekwe ukususwa kothisha bayiswe kwezinye izikole ngoba kukhona othisha abangazwani nothishanhloko abazosebenzisa lokho. Sifuna lolu hlelo lwenziwe nguMnyango kuphela futhi nawo ulwenze sesivumelene ngezinye izinto,” usho kanje.

Amaphoyisa aphenya icala lokudala udlame emphakathini.

Khonamanjalo kulindeleke ukuthi isimo sibuyele kwesejwayelekile eMdepha High, kwaXimba njengoba bekume nse ukufunda kulandela ukuhlaselwa kukathishanhloko yisigejana sabazali.

UMnuz Alfred Mkhize uhlaselwe yilaba bazali bamfaka amavelemane njengoba kuthiwa babemtshelile ukuthi uma engahambi kulesi sikole kukhona okusina kumjeqeza. Lesi sigejana kuthiwa besifuna kuphathe uMnuz Thobani Mngwengwe ngoba ungowasendaweni.

UMgcinimafa wesigungu esilawula isikole, uMnuz Sibusiso Sithole, uthe abazali bebebhodla umlilo emhlanganweni befuna amalungu e-SGB ashaye uthishanhloko ukuthi akhonjwe indlela.

Uthe abasawadingi eMdepha kanti bamfuna eqhubekile nokusebenza uMkhize ngoba basabuthemba ubuholi bakhe.

“Umhlangano uvumelene ngokuthi ukufunda nokufundisa kubuyele kokwejwayelekile kusasa (namhlanje) esikoleni. Abazali bathe abasamfuni uMngwengwe umnyango awumzamele esinye isikole azofundisa kusona,” usho kanje.