INLSA

Kufunwa noma ngubani ongaba nolwazi olungaholela ekutheni kugcine kutholakale iphoyisa lomgwaqo laseWestville, uThami Zondi, osekuyophela isonto engaziwa. Isithombe:Thokozani Ndlovu

NQOBILE MASIMULA

UPHITHENE amakhanda umndeni wephoyisa likaMasipala weTheku osekuyophela isonto lingaziwa ukuthi lashonaphi kade lagcinwa ngoMsombuluko liya emsebenzini.

UMnuz Thami Zondi (43) usebenzela ngasesikoleni samantombazane iWestville Girls High ukuwelisa abafundi umgwaqo.

Umshana wakhe, uMkhanyiso Mthethwa, uthe sebeqala ukuthuka manje ngoba seliyophela isonto bezama ukumthungatha kodwa kube nhlanga zimuka nomoya.

“Okuxakayo wukuthi umalume akaze anyamalale ngale ndlela kunalokho uke asifonele uma engeke abuye,” kusho uMthethwa.

Uthe okunye osekubaxaka wukuthi bebelokhu bemzama bengamtholi ocingweni lakhe kodwa ngoLwesithathu bese lukhala sengathi luvuliwe kodwa lungabanjwa.

UMkhanyiso Mthethwa uthi abasalali nasebusuku ngenxa yamalume wakhe uThami Zondi (kwesokunxele) ongaziwa ukuthi ushonephi. Isithombe:Thokozani Ndlovu

INLSA

“Bekuyizithuba zehora lesishiyagalombili ekuseni lapho sithe siyazama ukumthinta lwakhala ucingo kodwa lwangaphendulwa. Luze lwaphinde lavaleka ngezikhathi zasemini,” kusho uMthethwa.

Kuthiwa sekufonelwe cishe zonke izihlobo eziseduze okungenzeka ukuthi ukuzona kodwa zonke ziyazihlangula.

UMthethwa uthe nasemsebenzini bafonile bebuza ukuthi akakabuyi yini uZondi.

Ngosuku agcina ukubonakala ngalo wayegqoke isikhindi sikakhakhi, isikibha esinsundu namateku kanti inyufomu yamaphoyisa omgwaqo wayeyifake esikhwameni asiphatha eceleni.

Amaphoyisa KwaZulu- Natal akuqinisekisile ukuthi kunedokodo lomuntu odukile eliphenywa esiteshini samaphoyisa eWestville.

Kunxuswa abamfanisayo ukuba baxhumane namaphoyisa aseduze nabo ukuze ezoxhunyaniswa nomndeni wakhe.