.

IZIHLAMBEZO zingadala ukuthi ingane ishone ingakazalwa

KUNGAYIBULALA ingane yakho ukusebenzisa isihlambezo ngesikhathi ukhulelwe.

Miningi imishanguzo esetshenziswa omama abakhulelwe lapho bezama ukulungiselela ukuthi babelethe kahle.

Okunye basuke bekwenza ngoba kuwumkhuba owawenziwa abadala bebe bengayazi imiphumela yakho.

Isihlambezo omunye wemishanguzo ongoti bezempilo abangafuni ngisho ukuzwa ngawo. Bathi lo mshanguzo ungadala ngisho ukuthi ingane ife ingakazalwa.

UDkt Bongani Nxumalo wenhlangano ezimele, iKhanya Afrika, uthe kuvamile ukuthi abesimame bazisebenzise izihlambezo lapho bekhulelwe futhi lokhu kuba nomthelela omubi ezinganeni uma zigcina zizalwe ziphila.

Ziningi izizathu ezibekwa yilabo abasebenzisa izihlambezo. Abanye bathi basuke befuna ukuhlanza ingaphakathi labo ukuze bezozala kahle uma sekufika isikhathi kanti abanye basuke befuna ukusheshe bazale.

UNxumalo uthe ngesikhathi umama ozithwele ephuza isihlambezo nemishanguzo efana naso, kuthinteka isibeletho nokudala ukuthi ingane ifune ukuphuma ngesikhathi esingesona.

Ukuchaze kanje ukuzalwa kwengane isikhathi singaka fiki: “Kufana nokuthi umuntu uzama ukuphuma esicabheni esivaliwe. Ingane ilokhu izama ukuphuma ube umzimba kamama ungakakulungeli lokho. Ekugcineni ingane iyakhathala kokunye iphunyule izimoshe bese iphefumula udoti osuke uphumile. Ingagcina ifile,” kusho uNxumalo.

Mningi kakhulu umonakalo ongagcina udalwe ukuphuza le mishanguzo. Uma abakhulelwe bevakashela imitholampilo bayahlolwa ukuthi ingane isakhula kahle yini nokuthi imi ngaluphi uhlobo ukuze kwazeke ukuthi umama uzobeletha hlobo luni ngasiphi isikhathi.

Kokunye loyo ophuza isihlambezo usuke ethwele ingane enkulu obekuzodingeka ukuthi ahlinzwe uma eyibeletha.

UNksz Gabi Mdletshe ongumhlengikazi esibhedlela i-St Aidans uthe abakukhuthazi ukusetshenziswa kwale mishanguzo njengoba ibuye idale izifo ezifana nomdlavuza kwabesifazane.

“Ziningi izinto ezithakwa kule mishanguzo ngenhloso yokuthola imali kubantu. Ezinye zalezi zithako zinemithelela emibi futhi azaziwa ukuthi ziyini nokuthi ezokwenzani,” kuchaza uMdletshe.