Advertisement
X

Kwa-Renault banethemba nge-Koleos

UMHLAZIYI: Ngqeshe Buthelezi

IMOTO: Renault Koleos

AKUYONA imoto enogazi emndenini wakwaRenault kodwa bona babonakala bengapheli amandla ngayo njengoba esikhathini esedlule bethule esebenzisa udizili

KUZE kube yimanje akuyona imoto ebonakala inogazi emndenini wakwaRenault kodwa lokho bona bakubona ngelinye iso njengoba esikhathini esedlule bethule eno-gearbox ozishintshayo.

I-Koleos ewuhlobo lweSports Utility Vehicle bayifakele injini engu-2.0 dCi Dynamique Premium Automatic 4x4.

Iphuma no-gearbox odonsa ngamagiya ayisithupha. Ngaphezu kwalokhu le Koleos ithembekile ngoba ifakelwe i-Intelligent all-wheel drive system ehambisana neTrajectory Control.

Kuzwakala kungamagama amakhulu adidayo kodwa kulula nje ngoba umsebenzi wayo ukusabalalisa amandla kuma-exel amasondo angaphambili nasemuva kuye ngokuthi imoto ihamba endaweni enjani nezinga lamandla ewadingayo.

Lo gearbox udonsa ngamagiya ayisithupha uwamukela kalula amagiya.

Le njini ikhiqiza amandla afinyelela ku-110kW bese kuthi i-torque yakhona ibe ngu-320Nm.

Ijubane eliphezulu kule Koleos ligcina ku-173 km/h. Ijubane eliphezulu eliyilungele le moto leli ngoba iphakeme okusho ukuthi ayakhelwe ukugijima futhi yimoto yomndeni lapho sisuke singekho kakhulu isidingo sejubane.

Injini yayo engu-4 cylinder isebenzisa u-dizili futhi iyahambisana nemigomo ebekiwe yi-Euro 5. Njengoba isebenzisa udizili iyonga kakhulu ngoba ngebanga elingu-100km idla amalitha angu-7,9 awo.

Ziningi izinto ephuma nazo eziyibeka ezingeni eliphezulu njenge-cruise control, iTOM TOM satellite navigation system kanti njengazo zonke izimoto zesimanje zakwaRenault awuwudingi ukhiye uma uyidumisa ngoba isebenzisa ikhadi.

Okunye okuphuma nayo yi-climate control ezishintshayo, izihlalo zesikhumba ongakwazi ukuthi uzifudumeze uma kubanda kanye nesihlalo somshayeli esisebenza ngogesi. Lezi kanye nokunye okuningi okuhambisana nokuphepha ngezinye zezinto ezenze iKoleos yathola ukuhlonishwa nge-five-star Euro NCAP kwezokuphepha. Zonke izinhlobo zeKoleos ziphuma ne-warranty yeminyaka emihlanu emuva kokuhamba amakhilomitha angu-150 000 kanye ne-service plan yeminyaka emihlanu ka-100 000km.

SHOW ALL
Advertisement