Advertisement

Libuyele eNkantolo eNkulu elokubulawa kweJaji

LIQALILE futhi izolo eNkantolo eNkulu yaseWestern Cape icala lokubulawa kweJaji laseNkantolo eNkulu uPatrick Maqubela. Obhekene naleli cala ngumkakhe uNkk Thandi Maqubela kanye nosomabhizinisi uVela Mabena owayenza umsebenzi wokusabalalisa imikhiqizo yezempilo.

Bobabili bayaliphika icala lokubulala iJaji uMaqubela ngoJuni 2009. Izolo ubufakazi bethulwe yimenenja yakwa- Vodacom uPetra Heynecke obechaza ngemiyalezo yeselula nezinombolo ezabe zifonelwa kusetshenziswa amaselula amabili. Ebufakazini bakhe akazange anike imininingwane egcwele yemiyalezo noma izinombolo ezabe zishayelwa. Ubefakaza ngokuthi ikhona imiyalezo eyathunyelwa phakathi kukaMabena noNkk Maqubela kanjalo nomyeni wakhe ngaphambi kokuba abulawe.

uThandi Maqubela, obhekene necala lokubulala umyeni wakhe owayeyiJaji, uPatrick Maqubela. Lapha wathathwa etheleka enkantolo. Isithombe: Brenton Geach. Credit: inlsa

Phakathi nobufakazi ummeli kaMaqubela uMarius Broeksma usukumile echitha lobu bufakazi ethi abuliyisi ndawo leli cala. “Uma umbuso unezizathu ezithile ngalobu bufakazi, angazi mina ukuthi kungaba yiziphi,” kusho ummeli uBroeksma.

IJaji lithe kumele kuqhutshekwe nabo lobu bufakazi emuva kokuba uMshushisi uPedro van Wyk ethe bubalulekile futhi buyingxenye yecala.

Umbuso uthe iJaji uMaqubela waklinywa encishwa umoya waze wafa kanti ummeli kamma-ngalelwa uNkk Maqubela uthe iJaji lashona ngendlela ejwayelekile yokugula.

SHOW ALL
Advertisement