‘Ngiyakwazi okudingwa iBafana’

Gallo Images

IPHINI lesibili lomqeqeshi weBafana Bafana uSerame Letsoaka uthi uyakwazi okudingwa yiqembu lesizwe ukuze libuyise isithunzi salo. Isithombe: GALLO IMAGES

LUNGILE MAJOKA

ULWAZI analo uSerame Letsoaka lokusebenza ezigabeni ezahlukene kuSafa yilona abheke ukwelekelela ngalo umqeqeshi weBafana Bafana uGordon Igesund ekubuyiseni isithunzi saleli qembu lesizwe eseliphenduke inhlekisa ngenxa yemiphumela engemihle.

ULetsoaka uzishaya isifuba ngomsebenzi wakhe wokuqeqesha emaqenjini aphansi kuSafa njengoba eseqeqeshe iqembu lika-Under 17, Under 20, Under 23 namaBinneplaas.

Umenyezelwe ekuqaleni kwesonto noThomas Madigage njengamaphini ka-Igesund ngemuva kokuqagela okushaya eceleni kwabezindaba.

“Bengingeke ngisithathe isinqumo esifana nalesi uma ngingenaso isiqiniseko sokuthi sizokwazi ukuphendula izinto. Nginalo ulwazi njengoba ngike ngasebenzisana noPitso Mosimane futhi ngake ngasebenza noStuart Baxter imidlalo eyisithupha. Ngikwazi kahle okufanele kwenziwe nokulindelekile kithina futhi ngiyakholwa wukuthi sizokuzuza yize kungeke kube lula,” kusho uLetsoaka owaqala ukusebenza neSafa ngo-2001 eqeqesha u-Under 17.

ULetsoaka ushiye isikhundla sokuba yi-Technical Director kuSafa okusafunwa ozongena kusona ngemuva kokuthi uSteve Komphela esinqabile.

Uthe ukhethe ukushiya kulo msebenzi ngoba esefuna ukubuyela enkundleni okuyikhona akuthanda kakhulu.

Uveze ukuthi u-Igesund wakusho ebekwa ukuthi angathanda azomsiza.

“Umqeqeshi wangitshela esanda kuqokwa ukuthi angathanda ukusebenzisana nami ngoba iqembu lesizwe alifani neqembu (elizimele). Kunendlela okwenziwa ngayo. Ubazi ukuthi udinga umuntu onesipiliyoni eduze kwakhe.

“Ngamtshela ukuthi akanginike isikhathi sokucabanga kuqala. Besibuka nje noTommy (Madigage) abantu besho wonke amagama abawathandayo ngoba bese sivele sazi ukuthi uGordon ufuna ukusebenza nathi,” kulandisa uLetsoaka egcizelela ukuthi bazosebenza ngokubambisana no-Igesund ngeke babe ngo ‘nodoli’.

ULetsoaka kwakugijima ngaphansi kwesandla sakhe u-Andile Jali, Sibusiso Khumalo, Thulani Serero noKermit Erasmus ngesikhathi bengena esigabeni sesibili eNdebeni yoMhlaba ka-Under 20 ngo-2009.

“Umqeqeshi usitshele ngezinhlelo zakhe savumelana ngazo. Umsebenzi wokuqeqesha unenselelo nayo le sizimisele ngokubhakana nayo,” kuphetha uLetsoaka.