.

UNKSZ Thembelihle Gumede (kwesokunxele) eduduzwa nguColonel Zandile Ndlovu emuva kokuzama ukuzibulala ngenxa yezinkinga. Isithombe: BONGANI MBATHA

LUNGI LANGA

UKHALA ngokuxakeka nokuhlukumezeka owesifazane oziphonse olwandle lwaseThekwini ezama ukuzibulala.

UNksz Thembelihle Gumede (29), waKwaMakhutha uthe izinkinga esezingaphezu kwamandla zimenze wabona isisombululo sakhe kuwukuzibulala.

Kuthiwa ngeSonto ebusuku ngesikhathi evakashele izihlobo zakhe eGreyville, uNksz Gumede wathungatha amaphilisi efuna ukuzibulala ngawo. Umzala wakhe, UNksz Zinhle Cele, wamvimba kulokho. Lokho kwabanga ukuthi aphume endlini ngejubane ayoziphonsa olwandle.

UNksz Gumede uthe izinkinga alokhu azithwala kusukela ebuncaneni bakhe yizo ezidale ukuthi agcine efuna ukuzibulala. Uqhube wathi ukudlwengulwa ephindelela nokusala nosizi lokukhulisa izingane zakubo ezintathu enganayo nendawo yokuhlala, yikho okuqale izinkinga.

“Ngadlwengulwa kabili ngisakhula. Ngiqala ukudlwengulwa umama wayazi ngakho kodwa kwangaba khona akwenzayo. Kwaze kwaba wukuthi loyo owangidlwengula ubanjwa oqotsheni. Kodwa akugcinanga lapho, ngaphinde ngadlwengulwa ngumuntu owayeshade nomama. Ngenxa yokuthi sihamba sihlala nodadewethu kugcine naye esedlwengulwa.”

Uthe washonelwa ngunina wamushiya nezingane zakubo ukuthi azinakekele. Enye yazo isafunda isikole, enye yathola ingane yayishiya kuye ukuthi ayikhulise, kanti enye isize yaboshwa.

“Abazali basishiya singenayo indawo yokuhlala saze sagcina sihamba siqasha. Nengane yakithi encane isize yadlwengulwa nayo,” kusho yena echiphiza izinyembezi.

Umzala wakhe, uZinhle, uthe kubathusile lokhu okwenziwe nguThembelihle.

“Ngimjahe ngaze ngafika olwandle ngizitshela ukuthi ngizomfica. Ubaleke waziphonsa ezimotweni waze wafika olwandle nokuyilapho engene khona. Ube esenyamalala ngagcina ngingasamboni. Nami ngingenile olwandle ngithi ngifuna ukumsiza kodwa ngigcine sengiphumile ngoba ngibona ukuthi nami ngizomuka,” kuchaza uNksz Cele obebukeka ethukile.

Eqhuba uthe ngenxa yamagagasi abenamandla abatakuli bathe ngeke bakwazi ukumthungatha. Unyamalale ubusuku bonke waze waziqhamukela yena ngakusasa.

Okhulumela amaphoyisa KwaZulu-Natal, uCaptain Khephu Ndlovu, uthe bawutholile umbiko wokuthi kukhona umuntu odukile ngeSonto ebusuku.

Udokotela wezengqondo wenhlangano iMakhedama Consulting eThekwini, uDkt Sbusiso Mhlongo, uthe kuningi okungadala ukuthi umuntu afune ukuzibulala. Uthe kokunye kusuke kuyindlela azibona ngayo.

Uveze nokuthi liyanda kakhulu izinga labantu abazama uzibulala. Uthe lokhu kusuke kuyisikhalo sokufuna usizo.