.

UNKSZ Nokuthula Mgijima ube ngowesifazane wokuqala ukuthi abekwe njengomholi kaMasipala waseMzumbe. Isithombe: BONGANI MBATHA

AKAZIMISELE ngokufika noshintsho oluningi olungenasidingo owesifazane oqophe umlando ngokuba owokuqala ukuthi aphathe uMasipala waseMzumbe.

Yize ekuvuma ukuthi ubhekwe yinselelo enkulu, uthi ukulungele ukuhola uMasipala waseMzumbe uNksz Nokuthula Mgijima, ongowokuqala ukuqokwa abe ngumanenja walomasipala.

“Kwasekudalweni kwami ngingumuntu okuthandayo ukuba yingxenye yentuthuko. Kwakungijabulisa ukuzwa abesimame ebesisebenzisana nabo ezinhlelweni zentuthuko bethi uhlelo lwethu lubasizile. Ngangibona ukuthi yize kungeyona imali eningi abayenza kulolo hlelo kodwa leyo mali beyenza umehluko,” kusho uNksz Mgijima.

Abaningi ababekhona le ntokazi ithulwa njengomholi walo masipala, babezibuza ukuthi kazi inamuphi umlando ngomasipala nokuthi ngabe izokwazi yini ukuwenza lo msebenzi?

Akukuningi akuthembisile okwamanje kodwa ukwazile ukuchaza ukuthi unalo ulwazi ngokusebenza komasipala abahlukahlukene njengoba eseneminyaka eminingi esebenza kumasipala enza imisebenzi engafani.

Ngaphambi kokuthi afike lapho ekhona ube yingxenye kaMasipala wasoKhahlamba, owaseMathole, nowaseChris Hani.

Ukugcizelele ukuthi yonke imisebenzi abeyenza kubo yiyo emlungiselele ukuthi athathe lesi sikhundla.

Uveze nokuthi ukukhulela endaweni esemakhaya kube nomthelela omuhle ekutheni abe nesifiso sokusiza abantu. UNksz Mgijima ukhulele eHhewu, e-Eastern Cape.

“Ngingumuntu ozalelwe emakhaya nokubonile ukuxakeka kwabantu abasuka ezindaweni zasemaphandleni,” kusho uMgijima.

Uphinde waveza ukuthi ukubona kumuphonsela inselelo ukuphumelela kukamasipala waseMzumbe njengoba ulokhu uthole imiphumela emihle kumcwaningi mabhuku.

Uthe ufisa ukuthi baqhubeke nokuthola le miphumela njengoba sekungene yena kulesi sihlalo kodwa wagcizelela ukuthi ngeke akwenze lokhu eyedwa.

Lapho ephawula ngokuqokwa kwakhe njengowesifazane wokuqala ukuhola loya masipala uveze ukuthi kumjabulisile ukukhethwa yiwo.

Uqhube wathi ubona ukuqokwa kwakhe kungezinye zezindlela zokubonisa ukuthi uhulumeni wakuleli uzimisele ukuthuthukisa abesimame nokubanika ithuba lokuphatha izikhundla ezibafanele.