Sebeyahlungeka abafana emadodeni ku-Euro 2012

Lefty Shivambu

KUZOBHEKWA amagoli kuWayne Rooney uma i-England seyitholene phezulu ne-Ukraine emdlalweni we-Euro 2012 eDonbass Arena namuhla ngo-8.45 ebusuku. Isithombe: GALLO IMAGES

MTHOKOZISI MNCUSENI

SEBEQALILE ukuhlungeka abafana emadodeni ku-Euro 2012 esingena kuvuthondaba lwama-quarter final njengoba iNetherlands ebithwelwe ngeqoma iphume kuseva ingatholanga ngisho iphuzu elilodwa kweyamaqoqo.

I-Czech Republic, Germany, Portugal neGreece sebezifakile kweyomkhumulajezi kanti siye koloba lapha ingakadlali iSpain neCroatia ne-Italy neRepublic of Ireland (esiliwashile ijezi) obekuzocacisa ngamazwe amabili azonqoba ku-Group C.

Kuzokuthi namuhla i-England iqhuthane amazenze ne-Ukraine eDonbass Arena ngo-8.45pm ngesikhathi esifanayo iFrance idudulane neSweeden, nayo esiphumile kulo mqhudelwano, e-Olympic Stadium.

Amazwe ahlanganisa iPoland, Russia, Netherlands, Denmark, Ireland neSweden asephumile kulo mqhudelwano.

Ezimnandi ku-England wukuthi lo mdlalo izowugijima ngoWayne Rooney, umgadli wayo ophambili kwazise usesiqedile isigwebo se-Uefa esimenze wangayidlala emibili yokuqala yamaqoqo.

Khonamanjalo, kumnyama eqenjini lesizwe lase-Ukraine ngemuva kwemibiko ethi isilomo somgadli wayo futhi esingukaputeni, u-Andriy Shevchenko, angase angadlali ngenxa yokuthinteka edolweni. Ukungabi khona kukaShevchenko ku-Ukraine kungase kuyenzele phansi kwazise nguyena ohlale eyihola njengesibani njengoba enzile leli qembu, elisenalo ithuba lokudlulela phambili, linqoba ngo 2-1 kuSweeden emdlalweni wokuqala.

Ngakwelinye icala, ukubuya kukaRooney ku-Englang kuzomshiya edidekile umqeqeshi waleli qembu, uRoy Hodgson, okuzofanele akhethe ukuthi ngubani azombeka ebhentshini phakathi kuka-Andy Carrol, oshaye ingcwenga yegoli bebhekene neSweeden, noDanny Welbeck, okunguyena onqobise amaNgisi emdlalweni odlule.

Kuthe ngeSonto iPortugal yashayelela isipikili sokugcina kuNetherlands iyishaya ngamagoli amabili kaCristiano Ronaldo kwelilodwa likaRaphael van der Vart. Ngesikhathi esifanayo iGermany inqobe ngo 2-1 kuDenmark.

Olunye ulwazi: Euro.com

AMA-LOG E-EURO AMI KANJE:

Group A

Amaqembu P W D L Pts

Czech Rep 3 2 0 1 6

Greece 3 1 1 1 4

Russia 3 1 1 1 4

Poland 3 0 2 1 2

Group B

Germany 3 3 0 1 9

Portugal 3 2 0 1 6

Denmark 3 1 0 2 3

Netherlands 3 0 0 3 0

Group C

Spain 2 1 1 0 4

Croatia 2 1 1 0 4

Italy 2 0 2 0 2

Ireland 2 0 0 2 0

Group D

France 2 1 1 0 4

England 2 1 1 0 4

Ukraine 2 1 0 1 3

Sweeden 2 0 0 2 0