MINENHLE MKHIZE
K AYIMKHATHAZI eyabamkhomba ngenjumbane ngokubhacaza kweKaizer Chiefs kulezi zinsuku uBobby Motaung, oyimenenja yaMakhosi.
Kula masonto adlule izinkakha nabalandeli beChiefs bagxeke lesi sikhulu besisola ngokugodola nemali yokuthenga abadlali abaseqophelweni eliphezulu.
UMotaung, exoxa ne Solezwe, ukubeke kwacaca ukuthi kayimhluphi eyabamgxekayo ngokushaya udaka kwaMakhosi kulezi zinsuku.
Ekuqaleni kwesizini iChiefs ihluleke yancama ukuvikela isicoco sayo seMTN 8 iguqiswa yi-Ajax Cape Town ngo 1-0, wegoli likaNathan Paulse, eNelson Mandela Bay Stadium, eBhayi.
KuTelkom Knockout, Amakhosi aphoxwe yiMamelodi Sundowns ngo 3-1 kowamanqamu walo mqhudelwano eMoses Mabhida Stadium, eThekwini. KuNedbank Cup, iChiefs ibhajadiswe yi-Orlando Pirates ngo 2-0 kuLast 32.
Nesicoco seligi kubukeka kuzoba nzima ukuthi iChiefs isivikele ngempumelelo uma kubhekwa imidlalo esele. Leli qembu lisele ngamaphuzu angu-13 kuSundowns, ezihola phambili ngangu-54 ngemuva kwemidlalo engu-23.
IChiefs ihlezi endaweni yesine ku-log ngamaphuzu angu-39 emidlalweni engu-23. Amakhosi yiwona avikela isicoco seligi.
“Yinto ejwayelekile ukuthi uma izinto zingahambi kahle kugxekwe umholi. Njengomholi kumele ngilalele engigxekwa ngakho. Ngesikhathi iqembu liwina akekho ocabanga indaba yakho njengomholi kodwa uma izinto zike zangahamba kahle kuthiwa nguwena obhedayo. Ukugxekwa akungikhathazi kwazise isizini ayikapheli. Njengamanje sisasele neligi ngokwezibalo esisengayiwina yize kungekho ezandleni zethu,” kusho uMotaung.
UBobby ugxekwa ngokuthenga abadlali abafana noSula Matovu, Bongani “Drogba” Ndulula no-Ovidy Karuru abangalisizi ngalutho iqembu.
“Ukungahambi kahle kwezinto kuyingxenye yomdlalo webhola. Ngeke uhlale unqoba ngaso sonke isikhathi. Izikhathi ezifana nalezi ziyafika zidlule ebholeni. Iqembu alikho esimweni esibi ngaleyo ndlela. Sizolinda kuphele isizini bese sihlala phansi sibuke ukuthi yikuphi lapho sone khona. Yilapho-ke sizothatha khona isinqumo sokuthi kufanele singene emakethe yini noma cha. Okubalulekile manje wukuqedela le midlalo esele,” kusho uMotaung.
Emidlalweni edlule umqeqeshi weChiefs uSteve “Mphathi” Komphela uthwale kanzima sekumele aphume enkundleni, abalandeli belimisa ngesihloko elokuthi akahambe. Abanye bebejikijela izinto enkundleni, njengendlela yokutshengisa ukungenami kwabo.
“Akekho umdlali ongena enkundleni ngenhloso yokudlisela iqembu. Isimo esibhekene naso sizodlula, abehlise umoya,” kusho uMotaung.
UKaizer Motaung, ongusihlalo weqembu, ucashunwe kwelinye lamaphephandaba aphuma nsukuzonke, iSowetan, ethi ngeke amxoshe uKomphela kodwa uzomnika ithuba lokucija iqembu enye isizini, eseqinise isikwati sakhe ngabanye abadlali.
IChiefs izobhekana neMpumalanga Black Aces emdlalweni we-Absa Premiership ngoLwesibili, eMombela Stadium, ngo-7.30 ebusuku.
Eminye imidlalo yeligi:
NgoMgqibelo: Maritzburg Utd v University of Pretoria (Harry Gwala Stadium, 6pm); Orlando Pirates v Free State Stars (Orlando Stadium, 8.15pm)
NgeSonto: SuperSport United v Chippa United (Peter Mokaba Stadium, 3pm); Bloem Celtic v Golden Arrows (Dr Molemela Stadium, 3pm)
NgoLwesithathu: Ajax Cape Town v Platinum Stars (Cape Town Stadium, 7.30pm); Jomo Cosmos v Bidvest Wits (Olen Park, 7.30pm); Polokwane City v Mamelodi Sundowns (Old Peter Mokaba Stadium, 7.30pm)