Ubona ushintsho kuBafana uShabba

Gallo Images

UMDLALI wasesiswini weBafana Bafana neKaizer Chiefs uSiphiwe Tshabalala ukholwa wukuthi sezidlulile izinsuku zokushaya udaka eqenjini lesizwe lakuleli. Isithombe: GALLO IMAGES

MBONGISENI BUTHELEZI

noMALIBONGWE MDLETSHE

ISILOMO seBafana Bafana uSiphiwe Tshabalala sidalule okungabeka uSteve Komphela ethubeni elingcono lokuthatha ngokusemthethweni umsebenzi wokucija leli qembu.

UKomphela, obuyise injabulo eNingizimu Afrika ezakhe zishaya iGabon ngo-3-0 eMbombela Stadium ngesonto eledlule, ungomunye wabaqeqeshi abahlanu bakuleli abahlolwe yiSafa ukuba bawuthathe ngokusemthethweni umsebenzi wokucija iBafana.

UTshabalala, obengukaputeni kulo mdlalo weGabon kwazise ubengekho uSteven Pienaar, uthe uKomphela uyakwazi ukuvuselela abadlali njengoba enzile ngemuva kokuba kukhonjwe indlela uPitso ‘Jingles’ Mosimane emasontweni amathathu edlule.

“Ngiyazi ukuthi bekunzima ukuvuselela abadlali ngemuva kokuhamba kukaPitso kodwa umqeqeshi uSteve ukwazile ukwenza lokho. Umphumela wangoLwesihlanu ungubufakazi bendlela umqeqeshi asebenze kahle ngayo nabadlali ebavuselela nezinqumo azithathile ebezinzima. Ngithanda ukumbonga ngendlela asebenze ngokuzikhandla ngayo nathi (abadlali abebesekhempini yeBafana),” kusho uTshabalala.

UMosimane uxoshwa nje abalandeli bese benesikhathi bekhala ngaye besho nokuthi uyazithwala nokuyinto uKomphela abengakayikhombisi.

UTshabalala, oshaye igoli lokuqala kulo mdlalo, uthe bekubuhlungu kakhulu ukuthi iqembu lidlale izinyanga eziyisi-shiyagalolunye linganqobi mdlalo.

“Ukudlala izinyanga eziyisishiyagalolunye ngaphandle kokunqoba akuzange kube mnandi kithina njengabadlali njengoba bekubuhlungu nakubalandeli nakubaqeqeshi. Siyajabula ngoba sesiliqedile leli bhadi. Kuyajabulisa ukuthi sigcine siyinqobile le nselelo,” kusho leli nxele.

Amanye amagoli angoLwesihlanu avalelwe nguTokelo Rantie noMzikayise Mashaba.

“Umehluko ngeqembu langoLwesihlanu wukuthi besiwaqedela kahle amathuba abesihlula esikhathini esidlule,” kuqhuba yena.

Nokho uShabba uthe akumele babheke umqeqeshi omusha ngoba bayazi ukuthi kufanele baqhubeke lapho begcine khona ngoLwesihlanu.

“Kufanele siqhubeke lapho sigcine khona manje, ingcindezi isinkulu mayelana nokuya eNdebeni yoMhlaba eBrazil ngo-2014 nakweminye imidlalo esizoyidlala ezinyangeni ezizayo. Kufanele siqhubeke sisebenze kanzima sishaye amagoli njengoba senzile ngoLwesihlanu,” kusho uTshabalala.

Lo mdlali weKaizer Chiefs ubonge nabalandeli abababe-kezelele ngesikhathi bengawini.

“Siyabonga ngokusibekezelela, ngithanda ukuthi ngibonge nomqeqeshi ukuthi akwazi ukubuyisa isithunzi seqembu. Sesiqalile ukudlala njengeqembu,” kuphetha uTshabalala.

Umdlalo olandelayo weBafana ungoNovemba 14 lapho izobhekana khona neZambia, engompetha base-Afrika koweNelson Mandela Challenge.