UDlomo angase athole ithuba lokubuyela eringini noTimur

INLSA

UMPETHA wakuleli weHeavyweight uWiseman Sabalutho Dlomo ongase athole ithuba lempinda noTimur Ibragimov wase-Uzbekistan ngo-Okthoba. Isithombe: THOKOZANI NDLOVU

ZAKHELE XABA

ZINGASE zisheshe zesulwe izinyembezi zikaWiseman “Sabalutho” Dlomo osakhala ngakubiza ngokubanjwa inkunzi ekuhambeni empini yesicoco seWBA Pan African ngeledlule.

Kule mpi uDlomo ongumpetha wakuleli kuSA Heavyweight wehlulwe ngamaphuzu nguTimur Ibragimov wase-Uzbekistan yize emvuse phansi amahlandla ambalwa nokuthiwa kushiye abalandeli besibhakela bakuleliya zwe bebambe ongezansi.

Isolezwe lihabule ukuthi ngenxa yezikhalo ngesinqumo samajaji, le nhlangano isinqume ukuthi uTimur asivikele kuDlomo isicoco sakhe ngo-Okthoba. Kuthiwa lokhu kuphakanyiswe emuva kombiko ohanjiswe yiWBA kuBoxing South Africa (BSA) ngendlela uDlomo nomqeqeshi wakhe uZwilenkosi Magudulela abayimele kahle ngayo iNingizimu Afrika yize bebelwa impi yokuqala ngaphandle kwakuleli.

UThulani Magudulela weLudonga Boxing Promotions eqhatha uDlomo, ukuqinisekisile ukuthi iyakhulunywa eyokuthi uTamur anikeze uDlomo ithuba uma sekufanele avikele isicoco sakhe ngo-Okthoba.

“Impela kuyahlanganiswa ukuthi uDlomo athole elinye ithuba noTimur ngenxa yokuzinikela kwakhe nangendlela aziphathe ngayo,” kusho uMagudulela obezwakala ukuthi ujabule.

“Angijabule ngomphumela wempi kodwa ngihlabeke umxhwele ngendlela okuthiwa bayimele kahle ngayo iNingizimu Afrika.”

UDlomo uthe angakujabulela kakhulu ukuthola ithuba lokubuyela eringini noTimur ngenxa yezinto eziningi ezingahambanga kahle empini yokuqala. Uthe isikhathi sasigadwe ngumfana omncane oweyesibheke kumakhalekhukhwini. Okunye okuvelile ukuthi oDlomo abavunyelwanga ukuhamba ne-video yempi ababefuna ukuyomangala ngayo kuWBA ngokunganeliseki ngomphumela.

“Okwenzeka kubuhlungu kodwa ngingajabula ukuthola elinye ithuba lokuyobhekana noTimur,” kusho uDlomo.

Unompempe obephethe le mpi uStanley Christodoulou nemenenja yeBSA KwaZulu-Natal, uLes Andreason bavumelene ngokuthi uDlomo limfanele ithuba lesibili empini yalesi sicoco ngenxa yokuzinikela kwakhe. U-Andreason uvumile ukuthi umbiko weWBF ohambisana nezincomo bawutholile wathi kungamjabulisa ukubona uDlomo ephindela e-Uzbekistan.

Kwenzeka lokhu nje, uDlomo usahlalelwe wumsebenzi wokuvikela isicoco sakuleli.

Khonamanjalo, ezimpini ebezise-Orient Theatre, e-East London ngeSonto, uMzolisi Yoyo uvikele ngempumelelo isococo seSA Junior Welterweight kuThembelani Chithani. Kwezinye u-Athenkosi wehlule uSimthembile Sitali kwathi Sithembiso Faye wehlula uBanele Ntshoko. USiyabonga Siyo wehlule uLuvuyo Watata kwathi uThabo Sishwana wehlule uZolo Charlie. ULucky Kwaza ukhale ngaphansi kuDumisani Tose.