UMQEQESHI weBidvest Wits uGavin Hunt uyilungele ingcindezi abayifakelwa ngabalandeli be-Absa Premiership asebeqalile ukuthipha leli qembu njengelinye elizoba yingozi embangweni wesicoco seligi kule sizini ka-2016/2017.
Ngesizini edlule iWits iqede endaweni yesibili ku-log yePremiership. Isicoco seligi sigcine sidliwe yiMamelodi Sundowns esethubeni lokudla eseCaf Champions League.
Selokhu kuvulwe iwindi lokudayiselana ngabadlali iWits ibalwa namaqembu ahamba phambili ekusayiniseni abadlali abaseqophelweni eliphezulu. Leli qembu livele selisayinise uHellings Mhango, Eleazer Rodgers, Pentjie Zulu, Cuthbert Malajila, Darren Keets noMogakolodi Ngele.
Phezu kwalaba badlali iWits ishaya ngoPhumlani Ntshangase obeseqenjini lesizwe lika-Under 23 elidlale kuma-Olympic, Moeneeb Josephs, Daine Klate, Thulani “Tyson” Hlatshwayo, Sifiso Hlanti, Elias Pelembe nabanye. .
UHunt exoxa ne Solezwe ukubeke kwacaca ukuthi akubethusi ukubalwa namaqembu athishwa ukudla isicoco seligi kule sizini ezoqala.
“Kuhle ukuthi abantu basibona njengeqembu elizoba yingozi embangweni wesicoco seligi. Lokhu kusidweba sicace bha isithombe ngebanga esesilihambile njengeqembu kula masizini amabili edlule. Ngeneme ngendlela esisayinisa ngayo. Njengamanje sesibheke ukuthi sithole abadlali ababili noma oyedwa ngaphambi kokuthi kuvalwe iwindi lokudayiselana ngabadlali. Ingcindezi yokubalwa namaqembu angase enze kahle asiyisabi ngoba nathi sibheke ukulwa,” kusho uHunt.
Lo mqeqeshi ubalwa nabanye abashaya ngezicoco eziningi zeligi emlandweni wePremier Soccer League (PSL) eyaqala ngo-1996/97. UHunt wadla umhlanganiso neSuperSport United amasizini amathathu elandelana kumasizini adlule.
“Ngesizini edlule sibulawe wukungabi nawo umgqigqo wokunqoba imidlalo ilandelana. Kulokhu sifuna ukwenza isiqiniseko sokuthi asiliphindi iphutha elifanayo. Ukuvula namaqembu amakhulu akusithusi. Kimina yonke imidlalo iyefana. Awukho omkhulu futhi awukho omncane ngoba yonke isuke inamaphuzu amathathu,” kusho uHunt.
IWits izovula neKaizer Chiefs emdlalweni weligi ngo-Agasti 23 bese kuMTN 8 iqale ne-Orlando Pirates.